JESUS

Mee neif ddiuq leijef cheejju mei ddeehe bbei meegv Pv'laq nee malma meq. Chee gol nee meegv Pv'laq chee sseiggv heq bbei meeqdiul ddoq seiq. Meegv Pv'laq nee malma gge leel waf seil, ga gge dal waq. Chee chee elggeeq gol tee gge heq cheetv neif ggv cheetv see zherq neiq meq. Meegv Pv'laq nee zzerqderl neif ceesaiq ddeehe bbei malma seiq. Chee gguf seil meegv Pv'laq nee zzaiq teiq zeiq bbei xi ddeegvl teiq malma, nilmerqko loq sal ddee muq nee, mie jju gge xi ddeegvl bie seiq. Cheegvl chee Yaldai miq. Meegv Pv'laq nee mil ddeegvl teiq malma yil, Yaldai gge ninvq bbei zherq. Cheegvl chee Xalwaf miq. Meegv Pv'laq nee xi malma cheekaq chee eduwuq gge shul'oq teiq liuq bbei malma meq. Chee chee xi neif meegv Pv'laq gogoq bbei zzeezzee naiq'vf mei waq. Tee nee Yaldai neif Xalwaf gol sseiggv rhee gge Yidiailyuaiq shel gge koq ddeekoq loq teiq zzeeq zherq, sseiggv zaq bbei meegv Pv'laq ddeecei bbei xiyuq neiq. Elcheekaq ddiuq loq chee biqgguq neif shee shel gge ddeesiuq la me jju. Meegv Pv'laq nee Yaldai gol shel mei, “Koq cheekoq loq gge zzerqgv zzerqliu ddeehe bbei zzee tal nal, zzee me tal gge ddeederl jju. Cheederl gge zzerqliu leel zzee seil, shee zoq.” Nal ddeeni seil, ceeq gge kaq nee Xalwaf gol jujuq yil, zzee me tal shel gge cheederl gge zzerqliu zzee seiq. Pil seil, taf aigaiqssee gol la zzee zherq seiq. Tafggeeq chee kuaq keel seiq yil, meegv Pv'laq juq mail ggoggoq seiq. Meegv Pv'laq chee kuaq ddeemerq la me yi yil, kuaq jju gge xi chee tee kee hiul me bie. Chee zeeggeeq nee meegv Pv'laq nee taf nigvl gol koq loq nee ddiul nee meeqdiul keel seiq. Chee chee tafggeeq nee meegv Pv'laq gge geezheeq me komi zeeggeeq waq. Kuaq keel gge fvldv nee, ddiuq loq chee biqgguq neif shee shel gge ddeesiuq jju ceeq seiq. Nal meegv Pv'laq chee xi gol teiq dal pieq yil, xi gge kuaq ggeq lei yuq tal gge ddeebee teiq holho seiq. Cheebee gol nee xi chee meegv Pv'laq kee lei wul lee tal. Meegv Pv'laq nee xi gol seiq bbei lei jel yel bbee mei tee gge tei'ee loq teiq berl seiq. Meegv Pv'laq gge haiqssoji nee xi gge kuaq rhu bbei shee yel yil, xi neif meegv Pv'laq chee lei hohof tal. Cheesher chee meegv Pv'laq nee siaizhee Yalboflahail gol ddeemerq gai see zherq. Yalboflahail chee meegv Pv'laq gol ggee yil, Meegv Pv'laq nee tee gol o'luq yel bbeq shel, tee gol nee ddiuq ddeeddiuq gge xi gol bbei o'luq yel bbeq la shel jji. Meegv Pv'laq nee tee gol heel ku gge sheq nilniq bbeeq gge mailcherl yel bbeq shel. Mee gv gge geeq nilniq bbeeq bbei la yel bbeq shel. Yalboflahail chee meegv Pv'laq gol ggee yil, meegv Pv'laq nee xiggv bbei zeeq yel. Xi nee la tee gol “meegv Pv'laq gge zzee” waq shel. Ddeeni seil, meegv Pv'laq nee Yalboflahail chee eseel bbei meegv Pv'laq gol el ggee, meegv Pv'laq gge geezheeq el komi mei nvlmei zhelzhe ceeq, tee gge ssoji meegv Pv'laq juq shulshu naiq shel. Meegv Pv'laq nee sso cheegvl gol nee mailcherl sseibeil yel bbeq shel jji nal, Yalboflahail chee meegv Pv'laq nee sso shulshu naiq shel la teiq dal ggee, teiq dal komi. Chee zeeggeeq nee tee chee taf sso siul naiq'vf seiq. Tee ssertei ggeq berf ceeq cheekaq, Meegv Pv'laq nee shel mei, “Yalboflahail! Ssiuqssiuq cheegvl siul me niq. Neeq chee eseel bbei nge gol jilbbiuyuq bbei ngeq see seiq.” Yalboflahail nee ddoq mei, ddaddaq yuqpv ddeemei jjuq ye. Yuq cheemei chee meegv Pv'laq nee teiq holho yel gge waq yil, Yalboflahail nee yuq cheemei kol pil yil, taf sso kee di bbei meegv Pv'laq juq teiq shul seiq. Meegv Pv'laq nee yuqpv cheemei nee shulshuzo lei bbei chee, xi gol pieq bbei meeqdiul ddoq seiq. Tee gge pieq chee ebba nee ssomil pieq nilniq bbei pieq mei waq. Cheesher gol nee meegv Pv'laq nee xi lei jel naiq'vf bbei meeqdiul ddoq seiq. Xi gge kuaq rhu bbei shee lee gge shulshuzo ddeesiuq Meegv Pv'laq nee teiq holho seiq. Ebbei sherlbbei nee, meegv Pv'laq nee siaizhee he gol shel jji, kuaq me jju gge xi ddeegvl gol shulshuzo bbei zherq yil, xi rhu bbei shee zherq bbee. Cheegvl gge sai nee xi gge kuaq chercher tal. Cheegvl gge fvldv nee xi chee meegv Pv'laq juq lei hohof yil, dvqcherl baqssee bbei meegv Pv'laq kee lei hiul tal. Cheegvl gol chee “Miqsailyal” zeel neeq lerq, meegv Pv'laq nee Miqsailyal teiq zherq bbei xi lei jel yel, chee seiqmei dvqcherl baqssee bbei tafggeeq gge kaq bbei zoq. Miqsailyal lee gge ddeeni xikvl gai nee, tee nee bbei lee gge sher neif tee gol nee tv bbee gge sher chee siaizhee he nee shel jji seiq. Siaizhee Dalweil nee shel jji, meegv Pv'laq nee Miqsailyal gol “neeq chee nge gge sso waq” shel zoq. Che bbei shel chee Miqsailyal neif meegv Pv'laq jjaiq gogoq shel neiq mei waq. Siaizhee he nee shel mei, Miqsailyal chee xi lei jel yel gge Ddaha neif kaq waq. Siaizhee Yisailyal nee shel mei, “Pailjimei ddeegvl nee sso ddeegvl jjuq zoq”. Ssiulssiuq cheegvl chee meegv Pv'laq gge sso waq. Meegv Pv'laq nee tee gge sso ddiuq loq jiheq zherq chee, tee gge sso gol nee xi chee tee see zherq neiq mei waq. Siaizhee he nee teiq berl mei, Miqsailyal chee Yiseillil gge Boqlilheiq zzaiq loq nee jiheq lee zoq. Tee chee kaq ddeegvl nilniq bbei Yi'lulsa'leiq lee zoq. Tee gge zzee ddeegvl nee ngvq Jelye seecerqbbeiq nee tee qi zoq. Siaizhee he nee shel mei, Misailyal chee eduwuq gge mie nee xi lei jel lee zoq. Nal meegv Pv'laq nee tee gol seelha ggv seil ggeq lei seel zherq zoq, pil seil meegv leif bbee zoq. Mailni seil tee jiq zzai bel leif lee zoq, meegv Pv'laq nee quaiqbi teiq yel yil, tee nee ddiuq perperq lee zoq, dvqcherl baqssee bbei kaq zzeeq zoq. Nidvq kvl hal gai, Yisu zeel neeq miq gge ddeegvl jjuq. Tee nee bbei gge sher chee siaizhee he nee shel jji gge geezheeq gol nilnif nilniq ggv yil, xi nee Yisu chee Miqsailyal waq keel ye shel. Diailyi cheedial chee meegv Pv'laq gge tei'ee gol nee ceeq gge ddeedial waq yil, cheedial liuq pil seil, Yisu nee shel gge geezheeq neif bbei gge sher gol nee tee chee seiq gge ddeegvl waq mei see tal seiq. Diailyi cheedial loq chee, xi ddeegvl nee Yisu yai neiq. Shel bel lee seil, Yisu yai derl gge ddeegvl la me jjuq nal, xi gol Yisu see zherq bbee gel'vq seiqmei, meegv Pv'laq nee xi gol yel bbee shel chee mai zherq naiq'vf yil, diailyi cheedial pef mei seiq. Goq gge Tiq'a'fei'loq wei, sher chee ddeehe bbei eseel waq bbei see zherq bbee zeel neeq, ngeq sher cheehu gai nee mail tv bbei keke bbei ngvl gol shel yel bbee. Yalgvseeldv nee Loqma kaq bbei, Xi'liul nee Yeqtail kaq bbei cheekaq, meegv Pv'laq nee meegv zherqweq Jabeqlil gol Naqsa'leil zzaiq loq pailjimei Ma'lilyal shel gge ddeegvl kee hee zherq. Ma'lilyal, rer me ner. Chee chee meegv Pv'laq nee nee gol o'luq yel mei waq. Neeq chee ssiulssiuq bel yil, sso ddeegvl jjuq zo waq. Tee gge miqzeel chee Yisu zeel neeq miq naiq. Seiq bbei cheesher jju tal lei? Ngeq leel xi me sseeq see nee. Meegv Pv'laq gge Oqhei nee nee gol tv lee yil, meegv Pv'laq gge sso ddeegvl jjuq zo waq, tee nee dvqcherl baqssee bbei kaq zzeeq zo waq. Ma'lilyal chee Yeqdal zzaiq loq taf yagoq xi Yi'lilsabef liuq hee. Yi'lilsabef chee kvlpai ddeeq seiq nal, meegv Pv'laq nee o'luq yel yil, ssiulssiuq bel seiq. Yi'lilsabef! Ma'lilyal! Ma'lilyal! Nee nee rheeq jju ddeegvl waq seiq. Nee nee bel gge ssiulssiuq cheegvl la rheeq jju seiq. nee nee milddo neiq gge geezheeq ddee komi mai nee, nge ddvqmei loq gge ssiulssiuq leel zaq yil, cocof ceeq ye. Ngegge nvlmei goq seil, Ddaha nee ddeeq seiq. Ngeq chee ngeq lei jel yel gge meegv Pv'laq zeeggeeq nee zaq neiq. Chee gguf seil, cherl nee cherl guguq bbei ngeq rheeq jju shel zoq. Naqsa'leil xi ddeehe bbei gai komi! Kaq nee meeq shel ceeq mei, Ja'lillil xi neif Yeqtail xi ddeehe bbei, wumei wuddiuq leif bbee yil, miqzeel lei jeldiu bbee naiq. Yil, Ma'lilyal chee tee gol ree bel pil gge Yuerseil gguq nee Yeqtail gge Boqlilheiq zzaiq loq miqzeel lei jeldiu hee. Nal Boqlilheiq zzaiq loq nee yilgv shuq me mai yil, taf nigvl chee rua bbiuq ddeebbiuq loq teiq yil. Elcheehal yuqlvlsso ddeehual bbainil kol nee yuq zahu neiq, me jilmi gv nee meegv zherqweq meeqdiul ddoq ceeq, meegv Pv'laq gge bbubbu nee tafggeeq gol teiq kail. Neeggeeq lei jel yel bbee gge Ddaha Jidv chee Dalweil gge zzaiq loq nee neeggeeq rhu bbei cheeni jiheq seiq. Yuqlvlsso cheehual chee caimaif ddaq rua zzoq loq teiq yil gge ssiulssiuq cheegvl liuq hee. Pil seil tafggeeq chee xi lei jel yel gge Ddaha jiheq seiq shel gge koheeq xi gol shel yel neiq ye. Holha ggv seil, Yeqtail xi nee bbei ddu chee gguq teiq zhul bbei, ssiulssiuq cheegvl gol gefli bbei yel, miqzeel Yisu zeel neeq miq. Mailgguq seil, Yuerseil neif Ma'lilyal nee ssiulssiuq see bel meegv Pv'laq jjiq loq hee. Elchee'loq Simiail shel gge xiggv ddeegvl jjuq. Meegv Pv'laq gge Oqhei nee shel yel yil, tee chee shee gai nee Ddaha Jidv ddoq zoq bbei see. Ddaha wei, eyi ngvl nee shel gge geezheeq bie sie yil, ngeq bbiq bbei shee bbee tal sie. Ngvl nee ddiuq loq hee zherq gge cheegvl ngeq ddoq seiq. Meegv Pv'laq nee ggeq seeq gge cheegvl waq. Meegv Pv'laq nee nafggeeq gol o'luq yel hol! Yuerseil neif Ma'lilyal chee Mosi gge fafliuf gguq teiq zhul bbei sher ddeehe bbei sei pil seil, taf ddiuq Ja'lillil gge Naqsa'leil lei wul hee seiq. Yisu ceiqnikvl cheekaq, Yuerseil neif Ma'lilyal nee tee see bel Yi'lulsa'leiq Yuqyuilzif gol hee. Leif ceeq bbei jji neiq cheekaq, Yisu seil Yi'lulsa'leiq teiq dal jjuq nal, taf bbameif meqzeel me zhelddee. Yuerseil neif Ma'lilyal chee Yisu me jjuq bbei zhelddee pil seil, Yi'lulsa'leiq tv bbei lei shuq hee. Seelha ggv pil dal, meegv Pv'laq jjiq loq nee lei shuq mai. Yisu neif seeqzzee ddeecei bbei jaijul neiq ye. Gv'fvl jjiq cisiq yi, eneif ssiulssiuq keel ddaq? Tee Naqsa'leil nee ceeq meq. Ngafggeeq yi tee ddeecei jji neiq jilmi meq. Ngvlhe ggvmeniq seiq meil. Yisu gge geezheeq komi mai gge xi chee tee cheesiuq bbei gee zeel neeq rherq mai seiq. Nge sso, ezee bbei yil che bbei bbei neiq lei? Naf bba ngaf nigvl leel zzeelzzee nee me tal bbei neeq shuq neiq seiq! Ezee bbei yil ngeq shuq neiq lei? Ngeq chee ngaf bba goq hiul ner bbei ngvlhe me see lal? Yisu neif ebbamei ddeecei bbei lei wul ceeq. Tee gge ggumu neif gv'fvljjiq esseiqsseiq ggeq ddeeq, meegv Pv'laq neif xi bbei tee gol pieq. Tiqbi'lieq nee Loqma Kaq bbei gge ceiqwalkv cheekvl, Bi'lado nee Yeqtail ddiuq gge sherddeeq bbei, Xi'liul nee Ja'lillil kaq bbei, Yalnaq neif Gaiyalfaf nee shulshu teiq gua gge suiddeeq bbei. Elcheekaq, meegv Pv'laq gge geezheeq chee Yuerhail shel gge cheegvl gol tv ceeq yil, tee chee Yuerdail hoq kee nee xi gol “Nvlmei lei dobei seiqmei chercher naiq.” shel neiq ye. Kuaq juq ggoggoq bel Chercher lu laq! Meegv Pv'laq nee kuaq ggeq lei yuq yel zoq! Meegv Pv'laq gge siaizhee Yisailyal nee shel jji mei: "Xi ddeegvl bbainil kol nee ko ddeeq bbei shel mei, 'Ddaha gge sseeggv gai holho, Tee gge sseeggv dvldv bbei gai malma. Ke neif gge loq bbei fvq pil naiq, jjuq la ddeehe bbei zzeel pipiq pil naiq. Ggelgge gge sseeggv lei dvldv naiq, shuahiuq yiyi gge la pipiq naiq. Ddiuq loq gge xi chee meegv Pv'laq nee lei jel yel lee bbei ddoq zoq. Ngeggeeq seiq bbei bbei dder lei? Ngeggeeq ezee bbei ner lei? Nafggeeq reeq nilniq kuaq gge xi chee! Ngeggeeq seiq bbei bbei ner lei? Ngeggeeq seiq bbei bbei ner mei ddee shel nief! Bba'laq ni'lvl jju seil me jju gge xi gol ddee'lvl bbiu yel naiq, zzee zo jju bbee la che bbei bbei naiq. Seeqzzee. Ngeggeeq suil she xi waq, Seiq bbei bbei ner lei? Yuq ner gge dal yuq naiq, bbeeq bbei yuq me tal. Ngeggeq nil? Seiq bbei lei bbei dder lei? Xi gol zhersiuq me tal. Jelye mu me tal. Xi gol me waq gge jerguaq me tal. Ddee gge chee gol nee ggeq ner seiq. Ddee shel nief, Neeq chee Jidv el waq lei? Ngeq nvl jjiq nee chercher yel, Nal nge jerq heq gge ddeegvl lee zo melsee. Ngeq tee gge ssahol perq neegaiq me derl. Tee seil meegv Pv'laq gge Oqhei neif gge mi nee cher yel zoq. Tee nee zzei peipei pil seil, zzei'liu seil teeq loq keel bbee zoq, zzeipee seil jjil pil zoq. Meegv Pv'laq gge Oqhei nee to'liq teiq bie bbei tee gol meeq jal ceeq. Meegv nee meeq shel ceeq mei, "Neeq chee nge nee pieq gge haiqssoji waq, ngeq nee gol pieq." Yisu seecerqkvl ddaq ggv seil, meegv Pv'laq gge koheeq shel neiq. Tee gol meegv Pv'laq gge Oqhei nee teiq sherlsher yil, see bel bbainil kol hee. Elchee'loq nee ceeq gge kaq Sadail nee tee gol lucerqhal nvlmei zhelzhe, lucerqhal loq tee ddeesiuq la me zzee. Ceeq gge kaq nee shel mei, Neeq chee meegv Pv'laq gge sso leel waf seil, lvba nee ha teiq biail zherq laq. Meegv Pv'laq nee shel mei, Xiyuq chee meegv Pv'laq gol ziel neiq meq. Zzee ggvzzeiq gol dal me ziel. Ceeq gge kaq nee Yisu see bel jjuq shuaq gv tv seil, ddiuq mei ddiuq cheejju tee gol liuq zherq. Nee nee nge gai leel ceel seil, quaiqbi neif zaq mei zaq cheejju neeq yel bbee. Chee chee ddeehu bbei ngeq guq seiq yil, nge nee eneiq yel pieq mei dal waq. 'Ddaha meegv Pv'laq gai dal ceel naiq, tee gol dal vqree tal.” Ceeq gge kaq nee Yisu see bel Yi'lulsa'leiq hee, meegv Pv'laq jjiq gv teiq hiul zherq. Neeq chee meegv Pv'laq gge sso leel waf seil, meeq co bbee tal seiq. Meegv Pv'laq gge tei'ee loq nee teiq berl mei, 'Meegv Pv'laq nee meegv zherqweq teiq zherq yil, nee gge kee lvba gol bai me zherq bbei teiq kuq yel zoq.” Meegv Pv'laq nee shel mei, Meegv Pv'laq gol nvlmei zhelzhe me tal. Yisu Naqsa'leil lei wul ceeq, tee jilnieq ggeq ddeeq gge chee'loq seiq. El zaq lei? Zaq. Aisifreef cheeni, Yisu huiltaiq loq hee. Xi nee siaizhee Yisailyal gge tei'ee tee juq teiq guq yil, chu zherq. Ddaha gge Oqhei nge gol jjuq, tee nee ngeq ggeq seeq yil, xisi gol koheeq shel hee zherq. che bbei shel hee zherq: rheq teiq dda meif lei keel mai, mieqgger meif mieq lei ddoq, zheel ngaiq neiq meif lei bbiq mai zherq. Meegv Pv'laq nee xi gol maihail zzeesee yel rheeq tv seiq zeel neeq shel zherq." Tee nee shel chee hof! Geezheeq cheezziuq chee cheeni bie seiq. Eseel bbei bie seiq lail? Nal Miqsailyal nee dal bie zherq tal nee. Seiq bbei see tal lei? Neeggeeq chee koku teiq zeiq bbei nge gol che shel zoq, Cher'eegua, eduwuq lei malma laq. Nafggeeq leijef shel zoq. Neeq Jabefnoq nee bbei bel hee gge sher eduwuq gge jjikee nee la bbei laq. Ngeq neeggeeq gol shel, Siaizhee gol chee wumei wuddiuq xi nee pieq gge me jjuq. Yisu nee che bbei shel chee, eduwuq chee meegv Pv'laq nee ggeq seeq yil, ddiuq loq xi lei jel hee zherq gge miqsailyal waq shel neiq. Nal xi nee me zeeq ye meq. Tafggeeq nee tee miul neeq meeq gul naiq'vf. Yisu chee xi cheehual gol nee gai jji bel lei heq. Yisu chee Ja'lillil gge Jabefnoq zzaiq loq ceeq. Elcheekaq, Yeqtail ddiuq chee Loqma xi nee teiq gua. Yeqtail xi chee Miqsailyal nee tafggeeq meeqdiul lei jel yel lee bbei teiq lo. Bbibbiq leillei yel hol! Seeqzzee la'laq yel hol! Simeiq, nee gge leeq zzeeq el tal lei? Tal nee maf. Tee bbee me zo zo me we? Ngeggeeq gol meilmei yel laq! Ddeekaq meilmei yel laq! Yisu, ddee meilmei nief. Xi nigvl chee meegv Pv'laq jjiq loq nee nilni neiq. Ddeegvl Faqlilsail xi waq, Ddeegvl suil she xi waq. Faqlilsail xi cheegvl nee meegv Pv'laq gol nilni mei, “Meegv Pv'laq wei, jjefbbei seiq. Ngeq nvl xi nilniq bbei me ai gge me zzee, kuaq gge la me bbei, mil gol la me nielnie, suil she xi cheegvl nilniq la bbei me neiq. Ngeq ddeesi'qi loq nisseeq ha sser neiq. Ceiqfeil loq nee ddee'feil ngvl juq guq neiq meq.” Suil she xi cheegvl meqzeel sseiddiuq teiq hiul yil, gu'liu gaif ggeq bbeq me bbiu bbei, nvlmei gv heelhee bbei shel mei, Meegv Pv'laq wei, nge xi kuaq cheegvl gol maihail zzee ddee see nief! nge nee neeggeeq gol shel, meegv Pv'laq nee ggv bbei liuq gge chee suil she xi cheegvl waq meq, Faqlilsail xi cheegvl me waq. Heqrhee gge xi seil hiuq gv lei rhuq zoq, me derl zeel neeq vq gvl gge xi seil shuaq gv lei tv zoq. Leeq dvl bel jjiq hol gv bbee, elchee'loq nee nivai keel yil, ni lal tal seiq." Seeqzzee, ngeggeeq ddeehal bbei die seiq leel, ddeesiuq la me mai, Nal, ngvl nee leel che bbei shel seil, ngeq vai keel bbeq meil. Yagef! Yuerhail! Yagef, Yuerhail, leeq gai dvl bel lu! Gai baba lu! Ddaiq zeel! Ngafggeq leeq sherl seiq. "Ddaha wei, mail fai yel. ngeq xi kuaq ddeegvl waq." Rer me ner. Mailni seil, neeq chee xi mai tal seiq. Nge kee lee yil, ggvna bbei nge gge geezheeq komi seil, nafggeeq mie ddee tal seiq. Meegv Pv'laq shuq mai tal cheekaq nee shuq naiq, tee nee gai nvlnv ceeq cheekaq nee tee gol ggeeqyi naiq. Kuaq gge xi chee eduwuq gge kuaq gul bel meegv Pv'laq kee leif lee seil, meegv Pv'laq nee maihail zzeesee yel zoq. Nafggeeq chee zafzaq bbei meeqdiul lee zoq, bbi'bbiq leillei bbei see yel zoq. Tee ceeq ye. Tee chee'loq jjuq ye! Liuf! Yisu! Yisu! Nge gge milji cheeji ddee jel nef! Maihail zzee ddee see nef! Tee ceiqnikvl dal ggv melsee mei, gguq shee hol neiq seiq. Ddee liuq neiq bbee yel. Yaqlu, bailfaf me jju seiq. Yisu! Naf mil shee seiq yil, seeqzzee gol diedie me ner seiq. Rer me ner. Nge gol leel ggee seil, naf mil lei ga zoq. Ngvq me niq. Tee me shee see, teiq yilngvq ggef me. Wumeif, ggeq dee lu! Zzeezo ddeemerq teiq yel laq. Nge nee neeggeeq gol shel Cheesher xi gol shel me niq. Chee gguq seil, Yisu chee suil she neiq gge Matail shel ddeegvl ddoq. Nge gguq bbee laq. Yisu chee ddeehal bbei jjuq gv nee meegv Pv'laq gol nilni neiq. Mieqddoq pil seil, meiqtvq lerq bel ceeq yil, ceiqnigvl ggeq seeq, chee ceiqnigvl gol chee sheetvq bbei shel. Simeiq, Yisu nee tee gol Bideif la lerq. Simeiq taf ggeessee Aideiqlil. Yagef. Yuerhail. Fei'lil. Bado'loqmai. Matail. Doma. Yalleilfei gge sso Yagef. Feilruildai gge xi Simeiq. Yagef gge sso Yeqdal. neif mailgguq seil Yisu qi gge Ja'lol xi Yeqdal. Xisi meif chee rheeq jju seiq, meegv Pv'laq ddiuq chee nafggeeq gge waq. Ha ruq meif chee rheeq jju seiq, sherlsherl bbei lei yel lee zoq. Ngvq neiq meif chee rheeq jju seiq, ssaiq tal hol neiq seiq. Nge gol ggee gge fvldv nee, nafggeeq gol xi nee zzerq, xi nee me zeeq, xi nee cherpiel seil, nafggeeq chee rheeq jju seiq. Elcheekaq seil, meegv nee yel lee gge chee ddeeq meq yil, nafggeeq zaq tal seiq. Tafggeeq gge epvzzeef la gainief gge siaizhee gol che bbei bbei jji. Ceiqsher, ceiqhol, ceiqggv, nizerq. Ngeq jelye cheemerq dal jju meq. Che ddeemerq dal jju meq lail? Nafggeeq xiheeq meif chee sherkuaq jju seiq. Nafggeeq ddiuq loq gge zaq gol mul seiq. Tee xiheeq bbei bbeq me mi chee, nv keel ye. Ssaiq neiq meif chee sherkuaq jju seiq, nafggeeq chee biq gguq bbei ngvq ner hol neiq seiq. Xi ddeehe bbei neeggeeq kuddeeq cheekaq seil, sherkuaq jju seiq. Tafggeeq gge epvzzeef la jasiaizhee gol che bbei kuddeeq jji. Nge nee nafggeeq gol shel, sseeq jju gge xi gol pieq naiq. Nafggeeq zzerq gge xi gol ga naiq, jjiddv neiq meif gol nilniq yel naiq. kuaq gge xi rhu bbei nilni yel naiq. Xi nee bbeibbeiq heel lee seil, elcheebbeiq la teiq heel zherq laq. Xi nee bba'laq meeqdiul chee'lvl zzerq lee seil, goq loq chee'lvl la teiq yel laq. Xi nee meil lee seil, teiq yel laq. Xi nee ggvzzeiq yuf hee bbee'la, teiq yuf hee zherq laq. Xi nee seiq bbei yel lo mei, xi gol seiq bbei bbei bbee naiq. Nafggeeq gol pieq gge xi gol dal leel pieq gvl seil, seiq bbei meegv Pv'laq nee o'luq yel ssee lei? Xi kuaq meif leel tafggeeq gol pieq gge xi gol pieq gvl meq. Nafggeeq gol ga gge xi gol dal leel ga gvl seil, seiq bbei meegv Pv'laq nee o'luq yel ssee lei? Xi kuaq meif leel che bbei bbei gvl meq. Ezee bbei yil tee gol bal neiq leif meq? Tee juq neegaiq geezheeq neiq meq yil, Zai shee lei heq! Me waq. Sseeq jju meif gol pieq naiq, ga la ga naiq. Xi gol ezee tv yel me gua, lei guq lee lo me niq. Meegv Pv'laq nee bbeeq bbei lei yel zoq. Meegv Pv'laq gge ssomil bie zoq. Meegv Pv'laq chee xikuaq gol la ga meq. Maihail zzeesee gvl naiq. Meegv Ebba nilniq maihail zzeesee gvl naiq. Yisu, ngafggeeq ddee jel nief. Xi ko me jai seil, nee ko lei jai lee me zo. Xi gge kuaq me dil seil, nafggeeq gol kuaq dil lee me zo. Xi gol ruq yel seil, Meegv Pv'laq nee neeggeeq gol ruq yel zoq. Ddaha wei, ngvl nee sseeggv see yel laq. Neeggeeq xi gol yel seil, neeggeeq gol yel lee zoq. Xi gol sseidaq yel mei, neeggeeq gol sseidaq yel lee zoq. Mieqgger nee mieqgger gol sseeggv see yel seil, nigvl bbei ke loq ddol bbee zoq. Xi mieqliu goq gge qi leel ddoq nee, ezee bbei yil eduwuq mieqliu goq gge dolrerf seil me ddoq lei? Seeqzzee, ddee meilmei neiq yel! Ddaha wei, ddee baba neiq yel! Ngvl jjuq ngvl xiq gge cheegvl sseiggv rheeq jju seiq lei! Meegv Pv'laq gge geezheeq gguq mailgguq quq gge xi seil lahal rheeq jju seiq. Ngeq cheegvl see bbeqmi ye. Nee nee liuq mei tee chee Miqsailyal el waq lei? Faqlilsail xi cheegvl nee Yisu gol ha zzee kvq yil, Yisu chee taf goq bberzzeeq hee. Ssiulssiuq ddeehual bbei ggaihee fai laq. El mi lei? Fai laq. Tafggeeq ziail la jjaiq ziail nal, peel la jjaiq peel meq. Tee ezee bbei ceeq keel ddaq? Me see. Tee ezee bbei neiq leif meq? Xi cheegvl chee siaizhee leel waf seil, mil cheegvl ezee ddeegvl waq mei see dder meq. Tee jilniu ddeegvl waq bbei see dder meq. Simeiq, tee ezee ddeegvl waq mei ngeq see meq. Nge nee gvlseel ddeedial jai yel bbeq. Xi nigvl nee ddeegvl gge rhu ai, ddeegvl seil waxi bbeiq ai, ddeegvl seil wacerq bbeiq ai. Nal, nigvl bbei lei guq me loq yil, nigvl gol bbei lei guq me zherq seiq. Yil sseif cheegvl nee tee gol pieq rua tal lei? Nge nee seeddv mei ai bbeeq gge cheegvl nee pieq rua zoq. Shel hof seiq. Neeq mil cheegvl el ddoq lei? Ngeq naf goq ceeq mei, neeq nge gol kee cher jjiq me yel nal, mil cheegvl seil tee gge mieqbber nee nge gge kee cher yel, gv'fv nee seelsee yel. Ngeq naf goq ceeq mei neeq yi nge gol me bbeq, Tee yi me xeq bbei nge gge kee bbeq ceeq ye. Neeq yi yai'aiq nee nge gu'liu ma me yel, tee yi mamazo nee nge gge kee ma yel. nge nee nee gol shel, tee chee lei chercher mai gge kuaq bbeeq yil, nge gol la pieq rua; chercher mai gge kuaq nee gge xi seil, nge gol pieq la nee seiq. Nee gge kuaq lei chercher yel seiq. Neeq nge gol ggee yil lei jel mai seiq, bbiq bbei lei wul fai laq. Yisu neif meiqtvq ceiqnigvl bbei ddeeddiuq bbei hee yil, meegv Pv'laq ddiuq gge koheeq shel hee. Gainief ceeq nee ceeq, gguq nee nerl nal, Yisu nee lei malma ga gge ninvqmei ddeehual la mailgguq jji neiq. Moqdalla ddiuq gge Ma'lilyal la yi, Xi'liul kaq gge yagoq gua ga gge ninvq la yi, leijef Susanaf la yi. Elcheekaq, Ja'lillil ddiuq teiq gua gge Xi'liul kaq nee taf ggeessee gge ninvq lei shuq yil, Yuerhail nee kaka, pil tee nee Yuerhail rheq naqfvljjiq loq teiq derl. Seiq waq ye leiq? Ngeggeeq zzaiq ku kee tv seil, xi muq pil ceeq gge ddeehual ddoq. Shee gge cheegvl chee ninvq chertv ddeegvl gge ssoji waq. Yisu nee ddoq pil seil, maihail zzeesee yil, teiq shee cheegvl gol shel mei, “Kvlpai jil xi, ggeq dee lu!” Shee pil cheegvl cheekaq nee ggeq zzeeq ceeq ye, Yisu nee taf mo kee teiq lei keel heq. Tee gol milddo fai: Ngvl chee ngeggeeq nee teiq hu gge cheegvl el waq lei? Nvl, ngeggeeq bif gge xi hu ner lei? Seeqzzee! Seeqzzee! Chercherga Yuerhail nee milddo mei, Ngvl chee ngeggeeq nee teiq hu cheegvl el waq lei? Nvl, ngeggeeq leijef bif gge xi hu dder lei? Neeggeeq nee ddoq gge mi gge Yuerhail gol shel fai laq. Mieqgger mieq lei ddoq, keejjer lei jjejjeq. Nge gol me niqsi bbei ggee gge xi seil, rheeq jju seiq. Nge gol ggeq doqdo yel. Nge kodvqgv teiq zzeeq, el ddoq see? Ngeq Yisu ddoq seiq. Xi ddeegvl lerl pvl hee mei, lerl ddeehu seil sseeggv ku rhuq mai yil, xi nee tvltv seiq, vlssi nee la zzee bel hee seiq. Ddeehu seil, lvba gv rhuq mai, koyuq ggeq lal ceeq seil, jjiq me mul yil, bvq shee seiq. Ddeehu seil, qiderl ko loq rhuq mai, qiderl ddeecei bbei ggeq ddee ddeeq nee, qiderl nee teiq oq seiq. Zhee ga loq pvl mai gge seil, koyuq lal, bbaq bbaq, liu dail gol tv seil, ddeexi'feil ggeq bbeeq seiq. Seeqzzee, xibbeeq gol meilmei neiq cheekaq seil, ezee bbei yil biyul zeiq neiq lei? Meegv Pv'laq ddiuq seiq waq mei, nafggeeq gol see zherq bbee. Bif gge xi gol seil, biyul bbei dal shel bbee. Liuq zherq la, liuq me keke; komi zherq la, komi me tv. Biyul cheedial gge yilsee chee che waq: lerl chee meegv Pv'laq gge geezheeq seiq. Xi ddeehu seil meegv Pv'laq gge geezheeq komi mai seiq nal, lerl sseeggv ddaddaq rhuq mai nilniq bbei, ceeq gge kaq nee ggee me zherq bbei zzerq bel hee seiq. Ddeehu seil meegv Pv'laq gge geezheeq komi pil ggee seiq nal, lvba gv rhuq mai nilniq kee meeq me zhul, cheddef ggee me mul yil, sherkuaq ddee gobvl nee lei me ggee hee seiq. Ddeehu seil meegv Pv'laq gge geezheeq komi pil seil ggee seiq nal, nvlmei zzeelzzee gge sher gobvl, ddiuq loq gge zaq la mu yil, liu dail nal, mil me loq. Ddeehu seil zhee ga loq rhuq mai gge lerl nilniq, meegv Pv'laq gge geezheeq komi pil seil, gogoq bbei nvlmei loq teiq keel yil, ngaingaiq bel liu dail gol ba seiq. Mi teiq zheel nee teiq lei galga gge xi me jjuq, zhua bbvq teiq ji gge xi la me jjuq. Mi zheel gv dal teiq zheel zo meq. Che bbei zheel dal xi ddoq tal meq. Ezee ddeesiuq teiq zeel me gua meeqdiul lei ddoq lee zo me. Ezee ddeesher teiq galga me gua meeqdiul lei no lee zo me. Nafggeeq nvlmei zeiq bbei komi naiq. Komi gge xi gol seil, komi gvl zherq bbee. Komi me gvl gge xi gol seil, komi mai gge cheemerq la lei zzerf bbee zoq. Seeqzzee, wal mo neif wal ggeessee meeqdiul juq teiq hiul yil, ngvl ddoq naiq'vf ye. Meegv Pv'laq gguq quq gge xi seil, nge gge emei neif ebbvq ggeessee seiq. Ddeeni seil, Yisu neif meiqtvq ddeecei bbei leeq ggeq zzeeq pil seil, meiqtvq gol "Elggeeq heel gge elcheebbeq bbee laq" shel. Leeq keel bel jji neiq seil, Yisu teiq yilngvq heq. Seeqzzee! Seeqzzee! Yisu! Elggeeq shee hol neiq seiq. Leeq meeq ddeeq bbee ye. Elggeeq zherl shee bbee ye. Ddee jel nef! Elggeeq lei jel mai seiq. Ggee cheetv sseifgv hee lei? Tafggeeq Ja'lillil elcheebbeq gge Geflasei ddiuq tv seil. Yisu! meegv Pv'laq gge sso Yisu, nge gol seiq bbei naiq'vf lei? Ggeefyeq! Ngeq zheel yel me ddu. Neeq eneiq miq lei? 'Ddeehual' miq. Ddaha, ggeefyeq! Ngafggeeq gol holhol chee'loq hee zherq yel me ddu. Ngafggeeq gol bbuq cheehual loq hee zherq laq. Wei! Leif lu! Teiq hiul! Teiq hiul! Ceeq chee meeqdiul ceeq yil, Leif lu! bbuq cheehual loq hee seiq. Nee gge sainiq paq cheegvl! Ngafggeeq kee hiul me to! Meeqdiul fai! Chee'loq hiul me to! Fai! Chee'loq hiul me to! Ngvl sseiq bbee mei, ngeq ngvl gguq bbee. Ngvl gguq ddee bbee zherq hol. Lei wul fai laq. Meegv Pv'laq nee bbei yel gge xi gol shel fai laq. Yisu nee meiqtvq see bel Beqsaildal zzaiq loq hee. Nal xi nee see yil, tee gguq mailgguq ceeq ye. Kvlderl juq seil, Bideif nee shel mei, Seeqzzee, Chee'loq bbainil kol waq yil, xi cheehual gol nvlnv gv zzee zo neif yilgv shushuq hee zherq laq. Neeggeeq nee tafggeeq gol zzee zo yel laq. Elggeeq baba wallei neif ni nimei dal jju meq. Meegv Pv'laq wei, mee neif ddiuq malma gge ddaha, ngvl nee ddiuq loq ha mil zherq yil jjefbbei seiq. Wei, cisiq xi'qiq! Ggee me loq ddaf ggv meil! Xi nee ngeq eneiq waq shel neiq ye lei? Ddeehu seil chercherga Yuerhail waq shel neiq ye. Ddeehu seil Yi'lilyal waq shel neiq ye. Ddeehu seil ebbeisherlbbei gge siaizhee ddeegvl ggeq lei seel ye shel neiq ye. Nafggeeq nee shel seil, ngeq chee eneiq waq ye lei? Ngvl chee Jidv waq! Cheesher xi gol shel bbee me niq. Xi Gge Sso cheegvl jjeq ngaiq seiqmei, xi nee sseeq shuq yil, siul pil zoq, nal seelha ggv seil, ggeq lei seel lee zoq. Neeggeeq eneiq nge gguq bbee lei? Seeqzzee, ngeq ngvl gguq lei bbeq. Nal, ngaf yagoq xi gol see ggoggoq bel leq. Xi chee ee leeq ddv teiq cherl nee mail lei liuq seil, meegv Pv'laq ddiuq bbvq me derl. Nge gguq bbee gge xi seil, ezee me gua pil ruaq naiq. Eduwuq gge sheeqzeeljal babaq bel nge gguq lee naiq. Eduwuq mie lei zahu bbee seil, zahu zzaiq me tal. Nge fvldv nee shee gge xi seil, mie lei jel ddee zoq. Ddiuq loq cheejju mei xi ddeegvl nee mai pil bbee'la, mie lei sei seil, ezee gol kua lei? Xi chee ngeq neif nge gge geezheeq tafggeeq gge pa piel gel'vq seil, ngeq leif lee cheekaq, Nge nee tafggeeq chee nge gge pa piel bbei lei liuq zoq. Ngeq nafggeeq gol shel, chee'loq jjuq gge xi chee ddeehu seil me shee see nee meegv Pv'laq ddiuq ddoq zoq. Yisu nee meiqtvq seelgv see bel jjuq gv nee meegv Pv'laq gol nilni hee. Yisu nilni neiq cheekaq, shul'oq teiq gvgai heq. Bba'laq la perq bbei bbubbuf ceeq ye. Yi'lilyal neif Mosi meeqdiul ddoq ceeq yil, Yisu gol geezheeq neiq ye. Meegv Pv'laq gge sher nee nee bbei bie zoq. Neeq Yi'lulsa'leiq nee shee zoq. Pil seil, Bideif nee Yisu gol shel mei, Seeqzzee, elggeeq chee'loq jjuq chee hof seiq. Elggeeq hualjjiq seejjiq tvq laq. Bideif teif geezheeq neiq melsee nee, jiq ddeebie nee tafggeeq gol gai gal ceeq yil, tafggeeq sseidde bbei rer neiq ye. Jiq loq nee shel mei, "Cheegvl nge gge sso waq. Nge nee ggeq seeq. Tee gge geezheeq komi naiq." Seeqzzee! Seeqzzee! Ngaf ssoji gol maihail zzee ddee see nief. Tee ddee jel nef! Tee ddee jel nef! Ngeq ssiulssiuq cheegvl dal jjuq meq. Ngeq ngvl gge meiqtvq gol ceeq ddiul yel zherq bbei gashuq jji mei, tafggeeq ddiul tv me loq ye meq. Eiq! Meegv Pv'laq gol me ggee gge xikuaq wei! Ngeq chee nafggeeq kee nee ngaiq bel sseif cheerheeq gol tv ner lei? Naf sso see bel nge kee lu! Wei, tee gge pa gaif lei ga ye! Cisiq xuaiq! Seiq bbei meegv Pv'laq gol nilni dder mei, ngeggeeq gol la ddee meilmei nief. Che bbei nilni laq: Ngeggeeq gge meegv Ebba, ddiuq loq xi ngvl gol jilbbiuyuq yel hol. Ngvl gge ddiuq tv lee yel hol. Ngvl nee bbei bbee gge chee ddiuq loq nee bbei la meegv nilniq waq yel hol! Zzee ner gge ngeggeeq gol yel yel. Ngeggeeq nee xi gge kuaq me zeezeeq nilniq bbei, ngeggeeq gol la zeezeeq yel me ddu. Nvlmei zhelzhe mai zherq yel me ddu. Kuaq loq nee meeqdiul lei jel yel. Ggeeqyi leel ggeeqyi seil, mai zoq; shuq seil, shuq mai zoq; ku diudiu seil, ku pu yel zoq. ggeeqyi seil, me mai sher me jju; shuq seil, shuq me mai sher me jju; ku diudiu seil, ku pu me yel sher me jju. Nafggeeq loq gge ebba bbei neiq gge xi chee, sso nee ni ni shel nee, reeq lei yel zoq lail? Aiqgv ni shel nee, dvxiq yel zoq lail? Neeggeeq cheesiuq kuaq leel, ga gge ggvzzeiq ssomil gol yel ner bbei see nee, meegv Ebba seil lahal leel ggeeqyi neiq gge xi gol tee gge Oqhei yel me zo lail? Nge nee neeggeeq gol shel, ezee zzee bbee zeelneeq nvlmei jjeq me ner. Ezee muq bbee la seeddv jjeq me ner. Zzeeteeq jerq chee mie nee ddeeq melsee. Bba'laq jerq chee ggumu nee xi'qiq melsee. Liuf, vlssi chee dvq la me dvq, she la me she, hateeq la me jju leel, meegv Pv'laq nee ha yel meq. Neeggeeq chee vlssi jerq sseibeil bbeiq pv melsee. Neeggeeq nvlmei ddee zzeelzzee neiq nee ddeemerq mailgguq sseesherq zherq gvl lail? Jiljif gge ddeesher leel bbei me tv nee, bif gge sher ezee zzeelzzee zo jju lei? Befhof bbaq chee seiq bbei ggeq ddeeq ceeq lei? Tafggeeq lo me bbei tobvl la me ddaq, nal, So'loqmeiq gge bba'laq lieq leel bbalbba cheebbaq ddaq me ggv. Ddaq kol gge ssee chee cheeni teif jju, soqni jjil zoq leel, meegv Pv'laq nee teiq yulyu yel meq, Nafggeeq seil lahal leel shel me ner seiq. Nafggeeq chee jjaiq ggee me mul ye. Ngafggeeq elgge ggee zherq yel hol. Neeggeeq gge ggee cheetv chee meilssee lerl ddaf ggv bbee'la, ‘masa zzerq ggeq berq yil, heel loq teiq dvq' shel bbee'la, tee neeggeeq gge geezheeq komi zoq. Sherkuaq keel gge sher ddaf jju zoq nal, sherkuaq keel zherq gge xi seil sherkuaq lei jju zoq. Jiljif ddeegvl gol dal sherkuaq keel zherq pil bbee'la, lei zheel lee gge chee, lvtalbbieq nee jerberq teiq pai yil, heel loq gul jerq la lahal xuaiq zo melsee. Meegv Pv'laq ddiuq chee seiq waq lei? Meilssee lerl nilniq waq. Xi nee koq loq teiq dvq yil, ggeq ddeeq pil seil, zzerq ddeederl nilniq ggv yil, vlssi nee la zzer'laq gol nee piuq zal tal ye. Tee gge geezheeq ngeq komi me tv. Neeggeeq ezee bbei yil suil she xi neif xi kuaq ddeecei zzeezzee teeteeq neiq lei? Gguq gge xi dal cher'eegua ni meq, la'laq gge xi seil me ni. Ngeq ddiuq loq ceeq chee xi ggv shuq me ceeq, xikuaq shuq ceeq meq. Meegv Pv'laq ddiuq gge sher leijef ddeemerq jai yel laq. Neeggeeq rer me ner. Neeggeeq gge meegv Ebba tee gge ddiuq neeggeeq yel pieq meq. Neeggeeq chee cheejju mei qi pil yil, jjeqssoteeqmil yel bbee naiq. Che bbei bbei seil, eduwuq gge cheel me gvl gge jelye keecee neif zeiq me sei gge ngvhaiq chee meegv jju seiq. Meegv seil, xikv nee kv me zo, bbeeddiq nee la zzee me zo. Neeggeeq gge ngvhaiq sseiq jju mei, nvlmei la sseiq jju seiq. Ninvqmei, Nee gge gguq lei ga seiq. Wei, liuq laq! Tee lei ga ye. Cisiq xi'qiq ddeesher! Mee-mee-mee Meegv Pv'laq kuddeeq dder! Ceiqholkv seiq wei! Meegv Pv'laq nee o'luq yel hol! Elggeeq chee chualha lo bbei tal meq yil, chee chualha loq nee gguq malma tal meq. Aisifreef seil malma me tal. Me ggv lei ggv rhee gge xi! Neeggeeq Aisifreef cheeni seil teiq pai gge ee rua ceesaiq chee sherq bel jjiq deel me keel seiq lail? Ninvqmei cheegvl chee Yalbeflahail gge mailcherl waq, Sadail nee ceiqholkv paipai seiq yil, Aisifreef cheeni mail lei perq yel chee dder seiq lail? Ggv gge seeqzzee, ngeq seiq bbei dvqcherl baqssee gge mie mai tal lei? Ezee bbei yil ngeq ggv shel neiq lei? Meegv Pv'laq ggeq ceeq pil seil, ggv gge ddeegvl la me jjuq. Meegv Pv'laq nee zherq gge neeq see meq: Sso neiq mil nielnie me tal. Xi siul me tal; me waq gge jailzeil bbei me tal; ebbamei gai jilbbiuyuq naiq. Cheehu ddeehe bbei ngeq jilnief nee bbei bel ceeq seiq. Neeq ddeesher me bbei melsee. cheejju mei qi pil yil, jelye jjeqssoteeqmil bbiu yel naiq; Teil, nee gge ngvhaiq meegv jju seiq. Chee gguq seil, nge gguq bbee laq. Nal ngeggeeq ggv'laq bbei xi waq, Jelye jjaiq bbeeq. Xiheeq meif nee meegv Pv'laq ddiuq tv bbee chee sseiggv jjeq meq! Loqto nee goqhei loq bbvq jerq la jjaiq leel jjeq melsee meil. Teil, eneiq lei jel mai tal lei? Xi nvl bbei me bie, nal meegv Pv'laq seil bbei bie. Meegv Pv'laq ddiuq chee sseif cheekaq tv lee zo lei? Meegv Pv'laq ddiuq tv lee chee, mieq nee ddoq tal gge me waq. 'Chee'loq jju ye'; 'Elchee'loq jju ye' zeelneeq shel bie me tal meil. Meegv Pv'laq ddiuq chee neeggeeq gge goq loq jju meq. Mailni seil, nafggeeq chee Xi Gge Sso cheegvl gge nilwa ddoq bbeqmi zoq, nal, ddoq me tal. Xi Gge Sso cheegvl leif lee gge nilwa seil, ggaimieq zeil nilniq bbei mee gge cheebbeq nee kail bel elcheebbeq tv bbee zoq. Nal, tee chee sseiggv jjeq bbei gol ner, cheerheeq loq gge xi nee la tee me ni zoq. Neeggeeq cheehu ddoq mai chee, sseiggv rheeq jju seiq. Gainief gge siaizhee neif kaq chee nafggeeq nee ddoq gge ddoq bbeqmi nal, me ddoq; nafggeeq nee mi gge komi bbeqmi nal, komi me ddee. Ngeggeeq seiq bbei bbei ner lei? Meegv Pv'laq tei'ee seiq shel ye lei? Neeq seiq bbei liuq lei? Neeq nvlmei ddee'liu bbei, ggvggv nana bbei, seiq tal me gua bbei, seiq bbei bbei loq mei meegv Pv'laq gol pieq naiq. Zzeimeilyuf gol la eduwuq gol pieq nilniq bbei pieq naiq. Waq meq. Che bbei seil, mie ddee tal seiq. Teil zzeimeilyuf chee eneiq waq lei? Loqma seelbi me waq zo me? Teil Loqma kaq nil? Gainief xi ddeegvl chee Yi'lulsa'leiq nee Yi'lilge hee mei, sseeggv jul nee xizzerq gobvl. shee hol neif bbei ddeecaiq lal pil seil, sseeggv loq teiq gul. Shulshu teiq gua gge xi ddeegvl sseeggv cheekeeq loq nee gai ceeq. Xi cheegvl teiq gul bbei ddoq mei eel'ee bel lei heq. Lilweil xi ddeegvl la chee'loq jji mai mei, xi cheegvl ddoq pil seil, nilniq bbei eel'ee bel lei heq. Yeqtail xi nee liuqjil gge Sama'lilyal xi ddeegvl la chee'loq nee jji mai, tee nee dal xi cheegvl gol maihail zzeesee yel ye meq. Tee nee gai hee yil, seiljiq yai'aiq neif ree nee teiq cheel chee'loq mama, teiq boboq yel pil seil, eduwuq nee zzai bel ceeq gge cheemei teiq zzeeq zherq bel liushel loq nee lei zahu yel hee. Mail cheeni seil, ngvq jelye nipeil yuq bel ceeq yil, liushel gge ddaha gol shel mei, 'Ngvl nee tee teiq ddee zahu nief, jelye me mul seil, ngeq lei wul leef lei guq bbeq' shel. Yil, sseif cheegvl chee xizzerq nee zzerq mai gge cheegvl gge zzeimeilyuf waq lei? Tee gol baba yel gge cheegvl. Neeq la che bbei bbei fai laq. Ssiulssiuq gol nge kee lee zherq hol! Gai hu me niq! Meegv Pv'laq ddiuq bbee gge xi chee cheehu seiq. Nge nee neeggeeq gol shel, Ssiulssiuq nilniq bbei leel meegv Pv'laq gol me ggee seil, meegv Pv'laq ddiuq tv me tal. Nge rhu bbei ssiulssiuq cheegvl zahu seil, ngeq zahu neiq mei seiq. Nge gol leel zahu seil, meegv Pv'laq zahu neiq mei seiq. Nafggeeq loq gge jiljif cheegvl chee ddeeq cheegvl lei waq seiq. Wei, ezee sher tv ye leiq? Naqsa'leil ddiuq gge Yisu ceeq ye. Yisu! Yisu! Yisu, nge gol maihail zzee ddee see nief! Nge nee ezee bbei yel ner lei? Mieq lei ddoq zherq yel hol! Ddoq tal seiq. Nee gge ggee gol nee neeq lei jel mai seiq. Ngeq lei ddoq seiq! Ngeq lei ddoq seiq! Ngeq lei ddoq seiq. Yisu Yi'lulsa'leiq bbee naiq'vf gge sseeggv loq, xi ddeehual ddeehual bbei tee kee ceeq yil, seiq bbei bbei seil lei jel mai tal mei milddo neiq ye. Meegv Pv'laq ddiuq gge sher la milddo neiq ye. Xi cheegvl eseel bbei siaizhee waq ye. Ddaha wei! Ngeq ddee jel nief! Ddaha, ngeggeeq ddee jel nief! Ddaha gol kuddeeq ner! Ngeggeeq gol hof gge sseeggv shel yel laq. Yisu chee Ddaha waq shel neiq gge xi jjuq ceeq ye. Yi'lilge zzaiq loq chee xiheeq ddeegvl jjuq. Tee chee Yisu ddoq bbeqmi mei ggumu jil yil, zzerq ddeezzerq gv teiq ddo bbei Yisu liuq neiq ye. Tee suil she xi cheegvl waq ye. Sagai, meeq ssaq lu. Cheehal ngeq naf goq lei bbeq. Ngaf goq? Eneiq nee taf goq bbee bbeqmi leif meq? Sagai mei seiq bbei Yisu see keel ddaq? Gai komi yel. nge gge cheejju mei ngeq ddeeggee jjeqssoteeqmil gol yel bbeq. Ngeq eneiq gol zhersiuq jji mei, eneiq gol lulfei lei ciul bbeq. El waq leif meq? Suil she xi nee suil she bel ceeq gge xi lei guq chee! Ngeq yi me ggee meil! Tee la Yalbeflahail gge mailcherl waq meq yil, lei jel mai gge cheetv cheeni taf goq tv seiq. Ngeq chee pil gge xi lei shuq yil, lei jel ceeq meq. Gai komi. Elggeeq Yi'lulsa'leiq bbee. Siaizhee nee berl gge Xi Gge Sso cheegvl gge sher elchee'loq nee bie zoq. Tee gol meeqdiuljuq xi gge laqpu teiq guq zoq. Teeggeeq nee tee gol bailyil bbei ggaihee, cherpiel, jil nee pil, meebiq nee heel, siul pil zoq. Nal, seelha ggv seil, ggeq lei seel zoq. Ddiuq loq xi gol kuaq loq nee meeqdiul lei jel bbee chee, tee Yi'lulsa'leiq nee shee zo bbei see nal, Yisu chee teiq dal Yi'lulsa'leiq hee. Yisu ma'liu'liu zzai bel jji neiq cheekaq, xi chee zaq yil, koddeeq bbei meegv Pv'laq gol kuddeeq neiq, Yisu chee kaq waq shel neiq ye. Seeqzzee, che dde bbabbaq ler'lerq zherq me naiq. Nge nee shel, teeggeeq nee me ler'lerq seil, lvba cheehu nee leel bbabbaf lee zoq. Bbiq gge cheetv meegv jju, chee jerf shuaq me tal gge cheegvl pa jju yel hol! Yisu Yi'lulsa'leiq tv hol neiq seil, zzaiq cheezzaiq ddee ddoq nee, ngvf ceeq ye. Bbiq gge cheetv nee gol yel gge sher chee neeq cheeni nee see pil bbeef, hof seiq. Rheeq ggv seil, nee gol sseeq jju gge xi nee Nee gge ddaddaq nee ssiqlif ssiqli bbei jjeddvq ggeq zeil lee zoq. Teeggeeq nee neeq neif nee gge ssomil gol siul bel bbee zoq. Zzaiq la ddeehe bbei kail bel bbee zoq. Chee chee meegv Pv'laq nee neeq lei jel yel ceeq mei, nee nee me zhelddee zeeggeeq seiq. Yi'lulsa'leiq gge meegv Pv'laq jjiq chee qi'qi haiqhaiq gv bie ye, meegv Pv'laq kuddeeq gv me bie sie. meegv Pv'laq nee shel mei, Nge gge jjiq chee xi nee nge gol nilni gv waq. neeggeeq nee xikv xizzerq aq gv bie zherq sie. Tee nee nge gge ceesaiq juq jjeq lei heq. Gai teiq hu! Gai teiq hu! Seelbi lerf lu! Seelbi lerf lu! Xi sseidde ddeebeil nee Yisu chee kaq waq shel yil, sui bbei kaq bbei meif chee lahal lahal Yisu ddoq zzerf ceeq ye. Xi sseidde ddeebeil nee tee kaq waq shel neiq ye zeel. Kaq? Hameil, jilniu neif xikv gge kaq lail? Cheesiuq gge xi chee ddee jaijai neiq bel hee seil, mailjuq seil xi nee leimil seiq. Ggvna bbei ddee liuq neiq laq. Tee gguq jji xi ddeeni jerf ddeeni bbeeq. Xi tee gol liuq ddeeq. Tee kaq waq zeel neeq vq ye melsee. Ngeq nafggeeq gol see gai shel, cheegvl nee ggeq luail bel lee ddubbei seil, nafggeeq nee bbuq naiq. Tee nee shel chee waq zo me, xi cheegvl gol ddeesiuq nvl bbei ner seiq. Fafliuf seeqzzee neif faqlilsail xi chee meegv Pv'laq gge fafliuf xi gol seil meilmei, eduwuf meqzeel leiq me bbei yil, Yisu nee kaka neiq. Meegv Pv'laq jjiq loq nee, xisi gge ninvq chertv ddeegvl chee jelye sso nibbeiq keel neiq ye. Cisiq nee. Ddeemerq bbeeq bbei keel me tal lail? Nge nee nafggeeq gol shel, tee nee keel gge jelye chee eneiq jerq me gua bbeeq. Jelye jju meif nvl, eduwuq nee zeiq lei hal gge ddeemerq keel neiq ggef me; ninvq chertv cheegvl seil, eduwuq gge cheejju mei teiq keel mei seiq. Ddee shel neif, neeq ezee gol teiq ziel bbei che shel neiq lei? Eneiq nee quaiqbi yel lei? Nge neef see ddeezail lei milddo, Yuerhail nee xi gol chercher yel chee, meegv Pv'laq nee zherq nvl, xi nee zherq lei? Elggeeq seiq bbei lei shel bbee lei? Meegv Pv'laq nee zherq leel shel seil, 'Ezee bbei yil Yuerhail gol me ggee lei?' zeel neeq lei milddo lee zoq. xi nee zherq leel shel seil, xi ddeehe bbei Yuerhail chee siaizhee waq bbei ggee meq yil, elggeeq gol lvba nee diu shee zoq. Sseifgv nee ceeq mei ngeggeeq me see. Chee leel waf seil, ngeq la ezee gol teiq ziel mei walhe gol shel yel me bbee. Xi ddeegvl chee pvqta ddeekoq teiq dvq yil, xi gol teiq gal bel keeko gvq zzeeq hee. Pvqta mil rheeq tv seil, zherqweq ddeegvl teiq zherq yil, ddaha juq guq ner gge lei yuq hee zherq mei, koq gal xi cheehual nee ddeecaiq lal pil seil, laq nil bbei leif hee zherq. leijef zherqweq ddeegvl hee zherq mei, koq gal xi nee tee gol la lal seiqmei, cherpiel pil seil, laq nil laq solso bbei leif hee zherq. Leijef zherqweq ddeegvl hee zherq mei, cheegvl gol la biqna ddeecaiq lal pil seil, ddiul neeq meeqdiul keel seiq. Koq ddaha nee seeddv mei, 'Ngeq seiq bbei bbei ner lei? Nge gge haiqssoji gol seil, teeggeeq jilbbiuyuq zoq yil, tee gol hee zherq bbee.' Nal, cheehual nee taf sso ceeq bbei ddoq pil seil, zzeeqggue mei, 'Tee koq ddaha gge sso waq yil, tee siul pil seil, pvqta koq cheekoq elggeeq gge bbei tal seiq.' Leijef mailgguq jai laq. Pil, teeggeeq nee sso cheegvl rheq bel siul seiq. Teil chee gguq seil, pvqta koq gge ddaha chee seiq bbei bbei zoq lei? Tee nee koq gal xi siul pil yil, pvqta koq la bif gge xi gol lei gal zoq. 'Lv zeil beelrheeq nee mail teiq gul gge lvba chee'lvl chee jjiq gge gofzeesheef lei bie seiq'. Meegv Pv'laq nee che bbei shel chee ezee shel neiq lei? Lvba chee'lvl gv ddol mai gge xi seil, o qer zoq. Lvba chee'lvl nee diu mai gge xi seil, diu yil bbiubbiuq pil zoq. Seeqzzee, Ngvl chee hof gge meilmei neiq bbei ngeggeeq see meq. Ngvl chee xi gge pa nee ddeeq bbei me liuq bbei meegv Pv'laq gge geezheeq ggvna bbei meil yel neiq meq. Ngvl nee ddee shel nief, elggeeq nee Loqma Kaq gol suil nerl chee elggeeq gge fafliuf gol el hof lei?" Ddaha, juqkeeq keel neiq zo me meil! Ngvq jelye ddeebbeiq yuf lu! Chee eneiq gge gu'liu neif miqzeel waq lei? Loqma Kaq. Teil, Loqma Kaq gge ggvzzeiq seil, Loqma Kaq juq guq naiq. Meegv Pv'laq gge seil, meegv Pv'laq juq guq naiq. Neeq leijef ezee shel zo jju lei? Yuqyuilzif tv hol neiq seiq, Yuqyuilzif chee yu'leif kol yil shulshu ner. Yisu nee Bideif neif Yuerhail gol gai hee zherq yil, Yuqyuilzif gge chuq cheepeeq gai holho hee zherq. Ngeq die lee gai nee jjaiq nafggeeq ddeecei Yuqyuilzif gge ha cheepeeq zzee bbeqmi ye. Nge nee neeggeeq gol shel, Meegv Pv'laq ddiuq tv lee gol ba ngeq ha cheesiuq lei zzee me bbee seiq. Mee neif ddiuq gge Ddaha meegv Pv'laq wei, Ngvl lei jjefbbei seiq. Ngvl nee pvqta zzerq gol liu dail zherq. Neeggeeq gai yuq yil, bbiubbiu teeq laq. Meegv Pv'laq ddiuq tv lee gol ba bbei ngeq pvqtazie lei teeq me bbee seiq. Mee neif ddiuq gge Ddaha meegv Pv'laq wei, ngvl lei jjefbbei seiq. Ngvl nee ddiuq loq bbajjiq mil zherq. Chee nge gge ggumu waq, neeggeeq yel gge waq. Neeggeeq la che bbei bbei yil, ngeq lei seeddv naiq. Meegv Pv'laq nee xi gol geezheeq guguq chee, nge gge sai nee laqmei yil teiq dof seiq. Liuf, ngeq qi naiq'vf cheegvl la nge ddeecei ha zzee neiq. Xi Gge Sso cheegvl ddaf meegv Pv'laq nee shel jji nilniq bbei shee ner nal, tee qi cheegvl sherkuaq jju zoq." Ngeq el waq lei? Eneiq waq mei Ddaha gol milddo laq. Ddaha, eneiq waq lei? Ngeq nvl ngvl kee dal hiul bbeq me! Neeggeeq ddeeq meif seil jil meif nilniq lei bbei naiq, Sui bbei meif seil zherqweq lei bbei naiq. Ha zzee neiq cheekaq, zzee neiq gge xi nee ddeeq nvl, xi vqree xi nee ddeeq lei? Teiq zzeeq bbei zzee neiq gge xi nee ddeeq. Nal, nafggeeq gol jjuq seil, ngeq chee xi vqree xi waq. Ngeq jjeq ngaiq neiq cheekaq nafggeeq nge kee jjuq. Chee zeeggeeq nee ngaf bba nee nge gol yel gge ddiuq chee nge nee nafggeeq gol yel bbee. Nafggeeq nge gge ddiuq nee nge ddeecei ha zzee tal dal messaq, kaq zzeeqgv teiq zzeeq bbei Yiseillil chee ceiqnihual gol perperq tal seiq. Teil ngvl qi xi me jjuq seiq. Simeiq, Simeiq wei Simeiq, Sadail chee zzei geq nee geq neiq nilniq bbei neeggeeq gol nvlmei zhelzhe lee zoq nal, ngeq nee rhu bbei nilni seiq yil, ggee cheetv pil me tal seiq. Yil, neeq ebbvq ggeessee gol lahal ggee zherq bbei nvlmei bbei bbee naiq. Ddaha wei, Ngvl ddeecei bbei naqfvljjiq loq zzeeq, ddeecei bbei shee dder pil bbee'la, ngeq pieq meq. Bideif, ngeq nee gol shel, cheehal aiq juq gai, nee nee ngeq me see zeelneeq seesseeq leel shel zo melsee. Gainief neeggeeq ggvzzeiq me bel bbei meeqdiul keel cheekaq, ddeesiuq el gge lei? Me gge. Ddeesiuq la me gge. Nal, eyi cheekaq seil jelye neif ggvzzeiq bel bel bbee naiq. Ssertei me jju seil, bba'laq qi yil, ssertei haiq naiq. Nge nee neeggeeq gol shel, meegv Pv'laq gge tei'ee loq nee 'Tee chee xi kuaq waq shel zoq' zeel neeq teiq berl gge geezheeq chee nge gol nee bie lee zoq. Ddaha, liuq game. Ssertei niba jju ye. Mul seiq. Guhuil loq gge sui chee Yisu seiq bbei siul bbee mei zzeeqggue neiq ye. Sadail nee Ja'lol xi Yeqdal gge nvlmei loq hee. Tee chee sheetvq ceiqnigvl loq gge ddeegvl waq. Tee nee sui ddoq hee yil, Yisu rheq zherq naiq'vf. Yisu Seiljiq jjuq gv hee yil, meegv Pv'laq gol nilni hee. Neeggeeq juqkeeq loq ddol me zherq bbei nilni naiq. Yeqdal chee ngvq jelye seecerq bbeiq ddeeggv nee Yisu qi seiq. Yisu chee see meq, xi gol kuaq loq meeqdiul lei jel gge fvldv nee shee ner gge rheeq tv holneiq seiq yil, tee nee meegv Pv'laq gol nilni mei, Meegv Ebba! Ngvl nee leel pieq seil, cheejer teeq zherq yel me ddu. Nal nge gguq me zhul bbei, ngvl nee seeddv chee gguq dal zhul yel. Meegv zherqweq ddeegvl nee Yisu gol ga mailgguq yel neiq ye. Yisu gge zeel neegaif saitiel nilniq bbei leekeeqcol ddie neiq ye. Ezee bbei yil teiq yilngvq lei? Ggeq dee yil, juqkeeq loq ddol me zherq bbei nilni bbee naiq. Yeqdal, neeq pamei bbeq gol nee Xi Gge Sso cheegvl qi neiq lail? Ddaha, ngeggeeq ssertei zeiq el tal lei? Gai lu, tee gai rheq. Tal seiq. Wei, cisiq xi'qiq! Ssertei neif ddiuq yuq bel ngeq rheq ceeq chee, nge xizzerq bbei teiq liuq lail? Ngeq bbeqceeni bbei meegv Pv'laq jjiq loq jjuq mei, walhe ngeq me rheq. Nal, eyi cheekaq nvl naq la fvl sie, kuaq rheeq tv yil, walggeeq gge rheeq sie. Tee gai rheq. Ggvna bbei gai teiq liuq. Seelbi nee Yisu see bel jjiggai loq tv seil, tee gol “Yeqtail xi gge kaq” zeel neeq ggaihee neiq ye. Chee nvl kaq nee muq gge bba’laq me meil! Mailni gge sher seiq bbei tv lee zo mei ddee shel neif! Kaq wei, ngeggeeq lei jel yel bbeq lail? Ngeggeeq lei jel yel el bbee lei? Cheegvl la Yisu tafggeeq ddeehual waq. Nee gol shel, ngeq tee me see. Tee tafggeeq gol jjuq bbei ngeq ddoq jji. Ngeggeeq chee ngvl gge zherqweq waq. Xi bbvq jjuq chee el zaq lei? Neeq la tafggeeq ddeehual waq. Ngeq me waq wei. Tee la Ja'lillil xi waq yil, eseel bbei Yisu ddeehual waq. Mail ssail mail ssail! Neeq ezee shel neiq nge… ngeq me see. Yisu nee Bideif juq ddee liuq nee, Bideif chee Yisu nee shel gge geezheeq ggeq lei seeddvf ceeq. "Cheehal aiq juq gai nee, nee nee ngeq me see zeel neeq seesseeq shel zoq" Meegv Pv'laq wei, nge gol maihail zzee ddee see nief. Ngvl gge pieq cheetv nee, nge gge kuaq la ggeq ddeezail yuq yel. ngvl chee ggv neif dvq gol pieq. Ngvl nee gaidial gge nvlmei ddee'liu lei yel. Meegv Pv’laq wei, Ngeq lei jel mai gol nee zaq zherq yel hol. Pieq bbei ngvl gguq jji gvl zherq yel hol. Eneiq nee neeq lal neiq ye lei? Ddee zziuq neif! Leijef eneiq nee lal lee zoq lei? Tal seiq. Tal seif meq. Me mi lail? Tee see bel guhuil loq lu! Gai jji! Guhuil loq gge sui gai teiq aq yil, Yisu gol perperq neiq ye. Ddee shel neiq, neeq miqsailyal el waq lei? Nge nee shel pil bbee'la, walhe ggee me zo. Nge nee milddo pil bbee'la, walhe nee lei shel lee me zo. Chee gguf seil, Xi Gge Sso cheegvl chee meegv Pv'laq gge yiqjuq teiq zzeeq zoq. Teil, neeq chee meegv Pv'laq gge sso seiq wei? Nee nee shel chee hof seiq. Eneiq nee tee gol che gge quaiqbi yel keel ddaq? Tee kuaq jju! Tee nee shel neiq chee ngeggeeq mi seiq. Tee see bel Bi'lado kee bbee. Waq, waq, see bel fai! Gai jji! Tafggeeq nee Yisu see bel Bi'lado kee hee. Bi'lado chee Loqma gge sui loq gge jjaiq kuaq ddeegvl waq. Tee nee jjaiq nidvq gge xi gol sheeqzeeljal gv nee dil shee jji. Nafggeeq cisiq niel bbei nge kee ceeq chee, ezee sher jju yai? Cheegvl nee ngeggeeq Yeqtail xi jujuq neiq ye. Meegv Pv'laq jjiq loq nee la luail neiq ye. Tee gol seiq bbei zheel dder lei? Tee gge kuaq dil naiq! Ngeq tee gge kuaq ddeesiuq shel ddeesiuq la shuq me mai. Ngeggeeq tee gge kuaq shuq mai seiq. Tee neef mei Loqma kaq juq suil nerl me niq zeel. Eduwuq Miqsailyal waq kaq waq shel neiq ye. Kaq? Neeq chee Yeqtail xi gge kaq waq meq lail? Wal nee shel chee waq. Tee Ja'lillil ddiuq nee sheelbel Yeqtail ddeeddiuq bbei me waq gge meilmei neiq ye. Ja'lillil? Tee Ja'lillil xi waq meq lail? Chee leel waf seil, Xi'liul nee perperq zherq laq. Xi'liul Yi'lusa'leiq teif jjuq, el waq lei? Tee see bel Xi'liul kee fai! Neeq chee eneiq waq leif meq? Nee gge meiqtv chee ezee ddeehu waq lei? Xi nee shel mei neeq jjaiq heq zeel yil, nge gol ddee liuq zherq neif. Sherddeeq, Tee nee me waq gge dal meilmei, eduwuq chee kaq waq shel neiq ye. Cheegvl? Kaq waq? Kaq mul! Biq shee na bbei lal! Tee see bel Bi'lado kee leif fai. Chee Bi'lado nee gua ner meq. Xi cheegvl shee ner gge kuaq ddeesiuq la me bbei yil, tee gol biqsheena ddeecaiq lal pil seil, tee lei keel bbee seiq. Yuqyuilzif leel waf seil, naqfvljjiq loq teiq derl gge ddeegvl lei keel tal yil, Ba'laba lei keel laq. Waq. Ba'laba! Cheegvl siul pil! Ba'laba lei keel yel. Tee sheeqzeeljal gv teiq dil yi! Waq! Tee siul pil! Neeq, neif gge neeq, tee gol heel fai! Bi'lado, neeq ezee hu neif? Tee Yisu waq me! Nafggeeq ezee bbei yil che bbei tee zheel neiq lei? Tee Miqsailyal waq meq. Tee kuaq gge sher ddeesiuq la me bbei. Tee ggeq sherf lu! Xi cheehu nee ko ddeeq bbei bbabbaq yil, Yisu sheeqzeeljal gv dil naiq shel. Pil, Bi'lado nee Yisu siul tal zeel neeq teiq dil seiq. Xi siul yil naqfvljjiq loq teiq derl gge Ba'laba shel cheegvl lei keel seiq. Yisu gol seil tafggeeq juq teiq guq yil, sheeqzeeljal gv dil hee zherq. Mail ssail! Mail hiul! Mail ssail! Mail ssail! Mail bi'liq! Mailjuq hiul fai! Mail hiul! Mail hiul! Mail ssail! Mail bi'liq! Mail ssail! Mail bi'liq! Neeq, Mail bi'liq! Mail bi'liq fai laf meq! Ggeq dee! Ggeq dee! Neeq! Neeq eneiq miq? Ngeq Gu'lilnail xi Simeiq waq. Gai lu! Erq cerl pil! Neeq sheeqzeeljal gai bbuq. Ddeemerq chuq jji! Mail ssail! Mail ssail! Tee gol gai didi me to! Gai jji, xi zheeq me to! Mail ssail! Mail hiul! Mail jji! Ddaha wei! Ngeggeeq ngvl rhu bbei ngvq neiq! Jjiq ddee’fvl teeq laq! Ddaha wei, teeq laq! Yi'lulsa'leiq gge mil wei! Nge rhu bbei ngvq me niq, nafggeeq eduwuq neif nafggeeq gge ssomil rhu bbei ngvq laq. Zzerq herq gol leel tafggeeq nee che bbei bbei seiq yil, mailni zzerq bvq pil seil, seiq bbei lei bbei zoq lei? Meegv Pv'laq nee o'luq yel hol! Ngeggeeq ngvl rhu bbei nilni neiq. Gai jji! Meeq ssaq! Ddeemerq chuq! Ddeemerq chuq! Ddeemerq chuq! Neeq! Ddeemerq chuq! Ddeemerq chuq! Ddeemerq chuq mailgguq maiq lu! Ddeemerq chuq! Ddeemerq chuq jji! Gai jji! Neeq gaijuq nee jji! Ddeemerq chuq jji! Ddeehual bbei ddeemerq chuq! Sheeqzeeljal ggeq zeeq! Kozeeq meeq teiq lal! Erq mail keel! Ebba, teeggeeq me see yil, teeggeeq gge kuaq zeezeeq yel me ddu. Tee xi leel lei jel gvl nee, eduwuq eduwuq lei jel zherq laq. Neeq chee Jidv leel waf seil, eduwuq lei jel yil, sheeqzeeljal gv nee meeq ssaq lu leif. Me nilniq heq gge ddeesher ddee bbei neif. Yisu gol sheeqzeeljal gv teiq dil, xizzerq nigvl chee tee gge yiqjuq neif waijuq teiq dil. Chee chee gainief siaizhee nee shel jji gge geezheeq loq rhuq mei seiq. Nafggeeq liuf, bba'laq chee'lvl yi jjaiq xi'qiq meq meil. Wei, sheq pil zoq yil, laq mail keel laq. Nge nee shel seil, elggeeq lvl yuq lu laq. Jjaiq mie ga meil, nee nee gga seiq yil, bba'laq chee'lvl seiq bbei bbei bbee lei? Yisu gge gu'liu jerq nee "Yeqtail xi gge kaq" zeel neeq teiq berl gge do ddeepeil teiq dil ye. Yeqtail xi gge kaq leel waf seil, neeq eduwuq gol lei jel laq. Neeq Jidv me waq lail? Eduwuq neif gge ngeggeeq gol ddee jel neiq laq. Neeq meegv Pv'laq gai me rer lail? Elggeeq neif tee nilniq bbei zheel ngaiq neiq, nal tee me hof gge ddeesiuq la bbei me jji. Yisu, ngvl kaq bbei cheekaq seil, ngeq lei mil yel me ddu. Nge nee nee gol shel, cheeni neeq chee nge ddeecei bbei zaq ddiuq tv zoq. Elcheekaq chee ruzzee rheeq waq, ddeeddiuq bbei teiq naqfvl heq, naq bel mailnilko gge sai diai gol tv. Meegv Pv'laq jjiq loq gge liaiqzee chee liulggv nee niggee bbei mail teiq sheq heq. Ebba! Nge gge oqhei ngvl gge laqpu teiq nil bbeq. Beffvzai ddeegvl nee sher cheehu ddoq pil seil, meegv Pv'laq gol kuddeeq mei, "Meegv Pv'laq gol kuddeeq ner! Cheegvl yi xi ggv ddeegvl waq ye." Yallilmatail xi Yuerseil chee dvq seiqmei ggv gge ddeegvl waq. Tee chee guhuil loq gge xi waq nal, guhuil xi nee bbei pil gge cheesher gguq mailgguq me quq. Tee nee Bi'lado kee Yisu gge muq meil bel ceeq yil, nimei ggvq gai nee feiq ddee'feiq loq teiq ji heq. Ngeggeeq mamazo holho yil, Ddaha gge muq gol mama bbee. Ngeq la baba tal nal, ddeemerq chuq jji laq. Aisifreef tv hol neiq seiq. Si'qitiai meseeldee niel cheekaq, tafggeeq chee teiq holho gge mamazo yuq bel Yisu gge feiq loq ceeq. Tafggeeq nee ddoq mei, feiq ku teiq zeel gge lvmei chee'lvl mail teiq bi'liq ye. Feiq loq kvq keel mei, Ddaha Yisu gge muq me ddoq ye. Ezee bbei yil xi shee meif gol nee xi seeq shuq neiq lei? Tee chee'loq me jjuq seiq, ggeq lei seel seiq. Tee Ja'lillil nee nafggeeq gol shel jji seiq, 'Xi Gge Sso cheegvl chee xi kuaq gge laqpu teiq guq yil, sheeqzeeljal gv dil zoq, seelha ggv cheeni seil, ggeq lei seel lee zo waq.' Gai komi laq! Feiq ku gge lvba chee'lvl mail teiq bi'liq sie! Ngeggeeq kvq keel mei, Ddaha Yisu gge muq me ddoq sie. Ezeef? Ddaha gge muq me ddoq ye? Ngafggeeq xi nigvl ddoq ceeq ye. Meegv zherqweq waq ye, bbubbu neiq ye. Tafggeeq nee shel mei, Ezee bbei yil xi shee meif gol nee xi seeq shuq neiq lei? Eseel bbei waq. Eseel shel neiq meq. Eseel waq meq. Ngeggeeq meegv zherqweq ddoq seiq! Feiq teiq nil sie! Elggeeq gge Ddaha me ddoq hee sie. Bideif, ngafggeeq nee shel neiq chee eseel waq meq. Yisu chee meiqtvq nigvl gai nee meeqdiul ddoq ceeq. Tafggeeq sseiggv zaq bbei bif gge meiqtvq kee lei wul ceeq. Ddaha eseel bbei ggeq lei seel sie! Simeiq gai nee meeqdiul ddoq seiq. Ngeggeeq sseeggv loq jjuq cheekaq, tee me zhelddee mei, baba mail peel cheekaq dal, tee lei zhelddee meq. Yimawuqsee? Tee ezee bbei yil elchee'loq hee keel ddaq? Bbibbiq leillei yel hol! Neeggeeq ezee bbei yil zzeelzzee neiq lei? Ezee bbei yil teif niqsi neiq lei? Neeggeeq nge gge laq neif kee ddee liuq neiq seil, eseel bbei ngeq waq bbei see seiq. Nge gol ddee shushu neiq laq. Oqhei chee so'lo neif shee me jju, ngeq seil jju meq. Ngeq nafggeeq kee teif jjuq cheekaq, nafggeeq gol shel jji mei, Mosi gge fafliuf, siaizhee gge tei'ee neif Sheepiai loq teiq berl gge nge gge sher chee ddeehe bbei bie ner. Cheehu loq nee teiq berl mei, Miqsailyal gol chee siul shee zoq nal, seelha ggv cheeni seil, ggeq lei seel lee zoq. Xi chee tee gge miq teiq zeiq bbei, "kuaq ggeq lei yuq mai tal" shel gge koheeq chee Yi'lulsa'leiq nee jai bel ddiuq ddeeddiuq bbei tv bbee zoq. Nafggeeq chee sher cheehu gge zeilsseiq seiq. Ngaf bba nee yel bbeq shel gge nafggeeq gol yel bbeq yil, nafggeeq Yi'lulsa'leiq nee teiq hu, heq cheetv meegv nee yel lee teiq hu naiq. Ddaha nee nafggeeq gol o'luq yel hol! Meegv neif ddiuq loq gge quaiqbi ddeehe bbei ngeq guq seiq. Yil, neeggeeq xi gol nge gge meiqtvq bie zherq naiq, meegv gge Ebba, Sso neif Oqhei gge miq teiq zeiq bbei tafggeeq gol chercher yel naiq. Nge nee zherq gge leel waf seil, tafggeeq gol mailgguq zhul zherq naiq. Ngeq chee ddiuq cheeddiuq sei gol ba bbei nafggeeq gol dal jjuq meq. Siaizhee he nee gainief nee teiq berl mei, meegv Pv'laq nee Miqsailyal teiq zherq bbei xi lei jel bel lee yil, tee juq lei hohof zherq zoq. Yisu gge xiyuq gol nee meeqdiul ddoq seiq, Yisu chee meegv Pv'laq nee xi lei jel hee zherq gge cheegvl lei waq seiq. Siaizhee Yisailyal nee berl jji mei, “Pailjimei ddeegvl nee ssiulssiuq bel yil, sso ddeegvl jjuq zoq.” Meegv Pv'laq nee pailjimei Ma'lilyal gol ssiulssiuq bel zherq yil, Yisu jjuq seiq. Meegv Pv'laq gge tei'ee loq nee teiq berl mei, Yisu jiheq ceeq chee meegv Pv'laq nee elggeeq gol yel gge jilhal waq. Tee chee Jidv waq, meegv Pv'laq gge Sso waq. Yisu leel ddoq seil, meegv Pv'laq ddoq mei seiq. Heq cheetv la ddoq seiq. Yisu nee xi gge kuaq ggeq lei yuq yel, gguq la malma yel, xi gol tee gge dvqcherl baqssee gge ddiuq tv zherq bbeq shel. Tee nee eduwuq gge mie teiq zeiq bbei xi gge kuaq rhu bbei zheel ngaiq seiq. Seelha ggv seil, tee ggeq lei seel seiq. Tee gge heq nee shee jerq gga seiq. Yisu Jidv nee shel mei, “Ngeq chee nge gge mie meeqdiul guq gge quaiq la jju, lei yuq bel lee gge quaiq la jju.” Yisu gge cheecherl chee siaizhee he nee teiq berl gge chee gol hof ye. Meegv Pv'laq gge geezheeq chee eseel waq bbei Yisu gol nee meeqdiul ddoq seiq. Yisu chee meegv Pv'laq gge geezheeq meilmei neiq. Yisu gol teiq ziel bbei xi chee meegv Pv'laq see tal seiq. Meegv Pv'laq nee xi malma chee, xi gol nee zafzaq bbei xiyuq naiq'vf meq. Nal, xi nee meegv Pv'laq gge geezheeq me komi yil, kuaq jju seiq. Kuaq nee xi neif meegv Pv'laq mail ggoggoq zherq seiq. “xi chee kuaq jju yil, kuaq gge fvldv nee shee ner seiq”. Meegv Pv'laq seil, kuaq ddeemerq la me jju yil, kuaq jju gge xi chee meegv Pv'laq kee hiul me bie. Meegv Pv'laq nee yuqpv ddeemei nee Yalboflahail taf sso kee di zherq. Nilniq dal waq, meegv Pv'laq nee tee gge haiqssoji nee Yaldai gge mailcherl kee di bbei shee zherq. Che bbei bbei chee, Yisu gol ggee gge xi leel waf seil, meegv Pv'laq juq lei hohof zherq neiq meq. Chee zeeggeeq nee, Yisu gguq jji neiq gge xi seil ceeqddiuq loq nee zheel ngaiq me ner seiq. Dvqcherl baqssee bbei meegv Pv'laq kee hiul tal seiq. Yisu shee gv nee ggeq lei seel pil seil, tee gge meiqtvq gol shel mei, “nge gge miq teiq zeiq bbei ddeeddiuq bbei xi gol shel fai: kuaq loq nee lei dobei bel nge kee leif lee seil, meegv Pv'laq nee kuaq ggeq lei yuq yel zoq. Yisu nee tee gguq jji neiq gge xi gol meegv Pv'laq gge Oqhei yel lee zoq yil, meegv Pv'laq gguq mailgguq quq bie zherq zoq. Sherkuaq bbei pil gge mil cheegvl chee eduwuq gge kuaq meeqdiul lei shel pil seil, Yisu nee tee gol shel mei, “Nee gge kuaq ggeq lei yuq yel seiq. Nee gge ggee gol nee, neeq lei jel mai seiq.” Yisu nee shel mei, xi chee eseel bbei meegv Pv'laq gol leel ggee seil, kuaq ggeq lei yuq mai tal seiq. Jidv Yisu nee xi gol tee gguq jji laq zeel neeq lerq neiq. Yisu gguq jji bbeqmi gge xi leel waf seil, che bbei meegv Pv'laq juq nilni yil, meegv Pv'laq juq lei hohof tal: Meegv Pv'laq wei, ngvl nee nge gol pieq yel yil, jjefbbei seiq. Nge nee ngvl gge geezheeq me komi yil, kuaq jju seiq. Ggvmeniq seiq. Ngvl gge sso Yisu nee nge gge kuaq rhu bbei zheel ngaiq yel, nge rhu bbei sheeqzeeljal gv nee dil shee yil, jjefbbei seiq. Nge rhu bbei la ggeq lei seel yel yil, jjefbbei seiq. Ngeq ngvl gguq jji bbeq, Yisu nee ngeq lei jel yel gge ddaha neif nge gge mie gge ddaha bbei zherq pieq. Ngvl nee kuaq ggeq lei yuq yel yil, ngeq ngvl kee dvqcherl baqssee bbei hiul tal yil, jjefbbei seiq. Ngvl gge Oqhei nge gol ddee yel nief, ngvl gge Oqhei nee ngvl gge geezheeq nge gol ddee meilmei neiq yel. Ngvl gge Oqhei nee nge gol gayi zherq yil, ngeq nvlmei ddee'liu bbei ngvl gol pieq neif ngvl gguq quq gvl zherq yel hol. Xi mei xi cheejjuq bbei ngvl kuddeeq yel hol! Waq seiq waq! Yisu nee shel mei, “Nge gge yuf seil nge gge ko komi tv, ngeq la tafggeeq gol see, tafggeeq la nge gguq mailgguq lee zoq.” Yisu gguq jji neiq gge xi chee mexeq mexeq gai aq neiq. Yisu gge geezheeq sosoq neiq, Yisu juq la nilniq neiq, xi gol la Yisu gge sher jai yel neiq. Tafggeeq nvlmei loq teiq zzeeq gge meegv Pv'laq gge Oqhei gol teiq ziel bbei, Yisu nee tafggeeq gol meilmei yel neif gayi zherq neiq. Yisu nee shel jji mei, “Meegv neif ddiuq loq gge sher ddeehe bbei nge nee gua zherq seiq. Nafggeeq see naiq. Ngeq chee nafggeeq gol dal jjuq meq. Sheelbel ddiuq cheeddiuq sei gol ba bbei nafggeeq gol dal jjuq meq."