E mi winndaama Mawɗo Tiyofilus ko Yeesu waɗi nder amin, ngam anndaa goonga dow koo ɗume ko ɗum ekkitinma. Nder balɗe de Keysar Agustus laamooto leyɗe Roma Hirudus boo woni gomnaajo leydi Yahudiya, Joomiraawo lili malaa'ikaajo Jibriilu to surbaajo mo anndaa gorko gondo nder gariri Najaret bi'eteedo Maryaama. Taa hulu Maryaama. Joomiraawo suɓi barkiɗimma. A heɓay reedu. A danyay ɓiɗɗo gorko nden a hokkaymo innde Yeesu. No ɗum waɗorto? Mi anndaa gorko. Ruuhu Ceniido jippoyto dow maaɗa. Ngam non danyeteeɗo on ɗum noddiraymo 'Biɗɗo Joomiraawo, Ceniido'. Laamu maako re'ataa. Ngam non Maryaama yahi gariri gondi nder leydi Yahudiya to bandiraawo maako Alisabatu gooɗuɗo reedu. Alisabatu! A jaɓɓaama! Maryama am! A barkinaaɗo nder rewɓe, Biɗɗo mo caawuɗaa o barkiɗinaado. Nde nanmi kownol maaɗa, Biɗɗo gondo nder reedu am diwi ngam beldum. Bernde am e manta Joomiraawo, E mi nana belɗum Joomiraawo kisnoowo yam. Diga jooni yimɓe fuu noddiray yam barkiɗinaaɗo. Nane onon yimɓe gariri Najarat, Keysar Agustus Mawɗo Laamiiɓe wi'i ɗum lima yimɓe leyɗe Galili e Yahuudiya. Doole koo moye yaha to lenyol muuɗum yiwoyi ngam ɗum lima mo nden ɗum winnda innde maako. Ngam non Yusufu yahi gariri Beytalaama ngam ɗum lima mo kanko e Maryama mo o te'ata. Ammaa ɓe keɓaayi suudu e Beytalaama sey ni to ɗum nyamnata marle. E woodi woynaaɓe haade ɗon e ɓe mbaala yaasi e ɓe ndeena marle maɓɓe jemma. Sey malaa'ikaajo Joomiraawo wanganiɓe nder teddugal Joomiraawo. Hannde nder gariri Dawda ɗum danyanii on kisnoowo. Kanko woni Almasiihu Joomiraawo. Woynaaɓe ɓen njawɗi njehi ngam ngi'a ɓingel ngel to ɗum nyaamnata marle, kambe ngoni fudduɓe hokkuki habaru danygol kisnoowo, waato "habaru belɗum".