JESUS

Tingera zui shigawa. Hara ghajiarnu ngan balghajia. Yangshinu aminnu ngan ughuasanna. Tingera simqiande ganlasan ingannu kun kilieji buraalgha adaguna. Budasge sgejin iigua si Tingera bensinaa xiankisanna. Tingera zuolasannu iigua seinana. Hara ghajiarnu amuniinu iigua Tingera ughuasanna. Tingera xiruula kunge szajia. Aminnu wuurnu hawarshdenu puulie ughuanu nie kun jiu amute kundu wuulie diijia. Niraniinu Yaadang doudana. Tingera Yaadangnu niga haisiniinu awaa gharaa rienu ninie kunge szajia. Niraniinu Xiawaa doudana. Tingera kunnu sza daanu njienaa sambanaa kundu ughuajia. Tingera kundu Yidianyuan doudajin tigii yuanzinge ughuajia. Kun tie turo seinange Tingera taada soujia. Tingera kundu kiliena: "Yidianyuan turo almanu dieji uliguna, niga xjuoziragu almanu dieji luolguna. Diesa huguguna!" Niguu durnu Saadan, iilienu shiganu Xiawaade ghudalqila lii diejin almanu dielghajia. Xiawaa njienaa diegunu baaliu laohandenaa da dielghajia. Shiga Tingera arinna. Yadang da Xiawaa ghula iilienu shiganu uguanii sunisiguu Tingeralanu guanxi hajiraa xjijia. Yadang da Xiawaa ghula Tingeranu uguanu ii sunosinenge Yidianyuan turosa jiraa gharghaajia. Dii hugugunu da tolghuinde kurijia. Mulaa silaasa ligi hugugunu, mounanu rejia. Tingera kunnu niezhang sanana, hudunge sgil wuudina. Kunhge songde ngannu taada hariji regu moornu xiukijia. Tingera huiqiaaranaa kunnu amaxji jiulagunu kilie giejia. Niensa muxi Tingera Yaabolaahan doudajin kungede amaxji kunnu jiulagunu nigieji mudielghajia. Ngan Tingeranu xuriena, zunjinlana. Shiga Tingera Yaabolaahannu xuriejin sgil gharijia. Tingera ngandu seina, kuunge ughuaguna. Kuunu mulaa silaasge uluange reguna. Tingeranu foodi tigii uluanna. Yaabolaahan Shiga Tingeranu xuriena. Tingera ngannu sein kunna giji muulajia, ngannu pengyou wei gina. Niguu durnu Tingera Yaabolaahande kuulaa xianglie ra giji sgilniinu sidanglajia. Yaabolaahan nie kuula Tingera uluan mulaa silaa relghaguna giji mudienu uguaniinu sunosijia. Tingaanu kuunaa alaasa Tingeradu xiangla giikiji zhunbeilajia. Yaabolaahan qidighuanu waraanu Tingera kiliena, "Yaabolaahan, kuunu bie haila. Duo bu mudienu qi ndaa zunjinlana, munu uguanu sunosina". Tingera njienaa huninge zhunbeilajia. Huninu yernu xjuozira jiakaa diijia. Yaabolaahan huninu waraanu njienaanu kuu wei giji Tingeradu xianglajia. Tingera nie huninu Yaabolaahannu kuuwa giji kundu mudielghajia, ngan huino kurisa simqiandu kundu wulaanu zui shiga xianglagunu zhunbeilaguna, jiu njienaanaa xianglaguna. Tingera huiqiaaranaa kiliejia zui guijin kungenu pailaji xjilghaguna. Yaabolaahan xianlgasan huninu shdaar kunhgenu zuinu dinkilghaguna. Kunhge songde Tingeranu taadanu re shdaguna. Ugua mudielghajinhge ngannu Miisaiya doudana, Tingera laghaasanna. Huino kurisa ngan kundu rjiewu danglaguna. Miisaiya nie simqiandu regunsa muxi yi qian duo nian nie ugua mudielghajinhge ngan yaan ingan ganlagunu, ngandu yaan ingan gharigunu kilie giejia. Ugua mudielghajin Daawei kiliejia: "Tingera kiliena: "Miisaiyanu ngannu Kuu wei giji kiliena". Ugua mudielghajinhge "Tingeranu Kuu" giji nie uguala Miisaiya da Tingeranu guanxi seina giji kiliejia. Ngan kunhgenu jiulajinna, kunde rjiewu danglaguna. Ugua mudielghajin Yisaiya muxi kiliejia: "xjun bulai rguaanu turuoguna." Niraniinu Yimaaneilii doudana, yisi si Tingera da budangula handu wei gisanna. Ugua mudielghajinhge kiliena Miisaiyanu Booliihende turuoguna. Ngan jigenu funinenge rjiewu wei giji Yelusalengde uruoji xjiguna. Ngannu sein pengyounu sanshi kuai miangudu laanu ngannu daaldiguna. Ngan njienaa aminlanaa kunnu jiulaguna. Tingera ngannu digielghaanu tingereshdu gharaa xjilghaguna. Niensa huino ngan rdlongnu souwaanu reguna, Tingera ngandu quanlinu ughuaguna, ngan yongyuan rjiewu souguna. Liang qian niansa muxi niraniinu Yesu doudajin kunge nie qimsiande rejia. Ngan yi beizi zuolasan ingan ugua mudielghajinhge huiqiaara Miisaiyaanu jiurisan shdaarra. Nie niga dianying huiqiaanu daghaaji budanguladu Yesu kanna, ngan yaan kiliejia, ngan zuolasan ingan yaanniigunu, kiliejia. Yesunu peilaji yenki shdajin kun niga da gua. Kungede Yesunu kanna, ngan yaan kiliejia, ngan yaan zuolajia, ngan amaxji surghuasannu mudielghaguna giji kunge da Yesunu yanlagaanu nie dianyingnu peilawa . Qingaide Tiafeiluo, bu budangulanu jiura gharisan dundoghnu an shunxu shdaar jiuraa bou reya, ningisa iigua dundogh qi weigunu jua mudieguna. Aogusidu Luomaanu huangshangwa, Xiiluu Youtainu mulaa huangshang sghoudu, Shiga Tingera Nasalii ghajiardu niraniinu Maliiya doudajin xjunnu taadanu ugua kurgiejin daabulaji xjilghajia. Maliiya, qi bii ayi. Shiga Tingera qimu hudu seina. Qi bulai rguji turuoguna, niraniinu Yesu douda. Ama gijia! Ndaa kurgieji da gua. Shiga Tingeranu Funiesinu qinu dera bouguna. Qi turuojin bulainu, Shiga Tingera njienaanu Kuu wei gina. Tiensa huino Maliiya Yilisaabei ayinaa jiela xjijia. Shduogu, bulai lii rgujin Yilisaabei bulai rgu diijia. Yilisaabei ayi! Maliiya! Maliiya! Qi nie bieri jirgara fu weina， qi rugusan bulaidu fu weina. Bu qinu uguanu sunoshdaguu munu kieliendugu bulai biesaanu diulina. Bu sgil turonaa Shiga Tingeranu shduarlanii. Munu sgil ndaa jiulasan Shiga Tingeradu biesina. Niensa huino hana iila ndaa fu weinu giji kilieguna. Nasaliinu kun, sunosi! Luomaanu huangshang mingling bouwaa rejia, hanala njien ghajiardugu niranu jiuraa ra, ningisa dii Jialiilii da Youtai ghajiardu kidihaange kun weigunu mudieguna. Maliiya da kiliesan laohan Yuese ghula Youtainu Booliihen niranaa ghargala xjijia. Tirie kurisa, Booliihennu dian iigua sou durijia. Ngangula mou moripang turo soujia. Bierindugu ghajiarshdu hunimaa dulaajinhge weina, suannu hunimaanaa sgena. Ugua kurgiejin ngangulanu muxi pusaa soujia. Tingeranu ghual ali roghsa da boujia. Niudur Daaweinu ayilde tahgenu Jiulajin kun turuojia, ngan Niewan Jiiduu wa. Hunemaaqi maalii yerila xjijia. Mori karaaru jiang turuosan bulaingenu sgienu nie turuosan bulainu ingannu hanande kiliejia. Yuse da Maliiya Yesunu duraanu Yelusaleng xjijia, Tingeranu muxinu jielghaguna. Shiga nguambadu sein sgildu kun weina, niranu Xiimian doudana. Shiga Tingeranu Funiesi tiendu mudielghana ngan hugugunsa muxi Jiiduunu sgeguna. Niewan a, niudur qinu ugua shdaar cihoulajinnaa ndangge hamburaalgha. Munu nudundu qinu jiulajinnu sgejia. Nie bulainu qi laghaasannu mba。 Tingera tahgedu seinanu relghana。 Maliiya da Yuse ghula nie Niewannu guidin shdaar iilinu bankaanu, Yelusalengsa Nasalii haraa xjijia. Yesu haranghuor nasinu sghoudu Yuse da Maliiya ngannu Yelusalengde duraaji Dawaa Xjigu Dur nogxila xjina. Kudunaa harijin sghoudu muulana "Yesu kun jiurawa" giji. Ngan gua. Ngannu yeriji wuliji gua, yang Yelusaleng yeriji xjijia. Ghuraan durshdunu ngannu shiga nguambade yeriji wulijia. Ngan Youtainu laosihgenu jiuraanu soujia. Nie kannu bulaiwa sgil tigii szaliuwa? Ngan Nasaliisa rejia. muulasa ngan handu youldejia. Tahgede maafanladiwa. Kunhge Yesunu szaliunu guainge sgejia. Bulai, qi budangulanu amagaanu nenginii? Qimu yeriji tigiinga sghou ama giji danxilana. Amagaa ndaa yerinii? Tahge ii mudienu? Bu Aabanaa ingannu gualagunii. Ngangula handu Nasaliidu xjijia. Yesu sgildenaa szaliu dena, Shiga Tingera da kunhge seihange sgena. Nie Yesu niga beizinu zhenshi gushi wa Nie gushinu Lujia fuyinderu jiurijia Inspirational Films jialghana Yesu Luomaanu huangshang Tiibiiliunu haranthaawin fannu sghoudu Pangxiu Biilaaduo Youtainu mulaa huangshangwa, Xiiluu Jialiiliinu mulaa huangshangwa. Yaanaa da Geiyaafaa shiga xiangliajin kunnu danglagu sghoudu, Tingeranu uguanu Yilisaabeinu bulainu Yuehandu mudielghajia. Ngan Yuedan muruon qiriere, kiliena: "Mouresa furaa duwaa ra, nghuagunu jieshoula." Tahge mou moorsa duwaa ra! Nghuagunu jieshoula Tingera tahgenu zuinu raolie duguna! Nie si ugua mudielghajin Yisaya huiqiaara kiliesan tigii: Kun guijin ghajiarra kun qigharaaji kiliena: Niewandu moornu sghange xiu gi! Ngan youjin moornu tierjinge sza. Ghuan zhuomu iilinu tien gaa dii, Shiga, mulaa ulanu iilinu tierjin delghaa dii! Murii moorhgenu tusideghaa dii, dur taiganu tierjin delghaa dii! Hana iigua kun Tingera jiulagunu sgeguna. Budangula yaan warigui? Ama sza mba? Qi ndangulanu yaan warilghagunii? Tahge nie iilie tigiinga! Qi ndangulanu yaan warilghagunii? Budangula ama giji sgil hargui? Ghuor handaazi weijinhge tie guijin kundu niganaa ughuo dii. Diegunu da nie shdaar hughuawaa dii. Laosi budangula fei huraajinna. Yaan warigui? Dinkisan iiwai dii bei huraa. Budangula lai? Budangula yaan warihgui? Sier bii buli, mou ama jiaoji ghudal gulieji, kui giji, sier bii hgilie. gongzisa iiwai dii bii hgilie. Kilie qi Jiiduu weiu? Bu szula tahgenu nghuaji ughuana. Kilieya, duo ndaasa lamanqian kunge reguna. Ngandu hai daizinu aldaghaji ughuasa da ii jianghaguna. Ngan Tingeranu Funiesilanaa da ghalla tahgenu nghuaji ughuaguna. Ngan shdirganaa arilghaguna, taraanu cangkure gieguna. Shiga Tingeranu Funiesi ngusga tigii ngannu daaliirenu bouwaa xia. Tingeresa resan hgar kiliena: "Qi munu sein buliiwa, ndaa biesilghana." Yesu sanshi nasinu sghoudu kaishi huiqiaa jiankijia. Yuedan muruonsa rienu, Tingeranu Funiesi ngannu kun guijin ghajiarshdu duriji xjilghajia. Tirie sishi tian lidi laange iiliehgenu shiganu Yesunu sidanglajia. Yesu tigiinga dur ama da dieji gua. Iiliehgenu shiganu tiendu kiliena: Qi Tingeranu Kuu weisa, nie tarshinu shdimmadu furaalghaa dii. Huiqiaare kiliejia kun digiesa guang niga shdimmala digien gua. Iilie ngannu duraanu ulade xjijia, niga guade simqiannu guijiaanu iilinu quogiji jialghana. Nie simqiennu guijiaanu, quanli, sghan dangxi, iilinu qimu ughuaya. Nie ndaa ughuasanna, bu kandu ughuasa jiu ughuaguna. Qi munu muxi sgudie da, nie iili jiu qinuna. Huiqiaare jiurijia, “Tingeradenaa, Niewandenaa sgudie, uguanu sunosi. Iiliehgenu shiganu ngannu duraanu Yelusalengnu shiga nguambanu tolghuire pusilghajia. Qi Tingeranu bulai weisa, niensa diulaa bouwaa xji. Huiqiaare jiurijia: Ugua kurgiejindunaa kiliena qimu baohula, gharlanaa qimu tailaji, qinu kualnu tarshire ii noulghagui. Huiqiaare kiliena, Tahge Tingeranaa bii sidangla. Yesu Nasalii rejia, jiu tie shiga dusan ghajiarra. Qi seinasa. Qi seinasa. Yesu Hamburaagu Durshdu rankanu shdaar Youtai kunnu lahangdenu xjijia. Kunge ngandu ugua mudielghajin Yisayanu huiqiaaragu niga duannu moxilghana. Niewannu Funiesinu munu dera weina, Ngan ndaa laghaasana, seihan dundoghnu niezhang kunde ughuaguna. Waraasan kunhgenu tirgilie duguna, nudu ii sgejinnu sgelghaa deguna, daaraa sousan kunhgenu tirgilieguna. Kilielghana, Tingera kunnaa jiulagu sghou kuraa xia. Kilieji seina! Niudur tahge sunoshdasan nienge huiqiaanu duo gharghajia. Huiqiaanu gharghasannu, mbaanu? Miisaiya iisge nie huiqiaanu ghargha shdaguna. Amagiji mudienu? Tahge rankadurru uguanu kilieguna: "Snenbaa, njienaanaa zhi gi ba!" Tahge durang ndaa kilieguna: "Qi Jiabainong ayilde gisan dundoghnu, ayildunaa da gi ba." Bu tahgedu kilieya! Ugua mudielghajinnu njienaanu ayildunaa zailien gua. Yesu nie uguala kilieji ngan Tingera laghaasan Miisaiya wa, kun jiulala relghasanna. Youtai kun chengrenlaji gua. Ngangula ngannu turguaa bou xjilghaa degui gina Yesu jiu kun jiurasa youwaa gharaa xia. Ngangulasa hajiraa xia, Jialiiliinu Jiabainong bouwaa xjijia. Nie sghoudu, Youtainu guijiaanu Luomaa kun zhankaa soujia. Youtai kun muulaji Miisaiya ngangulanu jiulaa gharisa. Qi pingannasa. Qi da pingannasa. Xiimen, qinu chuanra gharisa uligunanu? Uliguna。 Ngan jougunii, pujia ba? Qi budanguladu kilieji ughua! Kilie! Yesu, ugua kilie! Ghuor kun Tingeranaa nguambadenu yangjilala xjina. Niga Faalisai kunna, niga fei huraajin kunna. Faalisai kun pusaanu kilieji yangjilana, "Shiga Tingera aa! Bu zaizi kunla sarlan gua, tie hualghajin, mou kun, ghada naadijin sarlan gua. Tie niga fei huraajinla da sarlan gua". Bu niga xingqidu ghuor hui nang ginii, haran deragu niganu qimu ughuanii" Fei huraajin huladunu pusaa soujia, tingershdejia nou da shdan gua, xjiunaa chuidaji kiliena, "Tingera aa! Ndaa mou kunnu raolie dii". Bu tahgedu kilieya: Tingera nienge kun duilana gina, Faalisai kunnu pujia. Nie ndurrii gijinnu duoraji boulghaguna, nie duora weijin kunnu ndurshdalghaguna. Chuannaa kaigaanu szunu guandenu xji. Tirie qi da qinu nukuarji jighasi wangnaa tii. Ai, laosi, budangula suannu lisge wariwa, yama da loula shdaji gua. Qinu uguanu sunosaanu bu wangnaa tiiya. Yaage! Yuehan! Hahahaha, hahaha. Yaage! Yuehan! Chuannaa kaigaanu banglala ra! Maalii ra! Luolguna, chuan zhuanglaa diurghaa xia! Hahahaha, hahaha. Niewan, qi jouwaa dii, bu shiga mou kunna. Bii ayiu. Niensa huino, qi kun huraajin danglaguna. Tahge munu taada ra, sunosi, tingesa digieguna. Tingeranu yeri, taadadu weigu sghoudu ngannu yangila! Mou kun mou dundoghnaa giewaa dii, sgil mou kun muulasannaa giewaanu Tingeranu taadanu haraa ra. Tingera niezhang sanana, ngan hudu raolie diiguna. Tahge biesisange gharaa xjiguna, pingange duraa xjiguna. Nou! Ngan rejia! Ngan ndiriewa! Yesu! Yesu! Qimu yangjilaya, munu nigahaan xjunnu jiula!- Ngannu niezhangge sana! Ngan haranghuor haan nasiwa, huguaa dugu tigiinga. Yaalu, seina gua. Yesu! Qinu xjun huguaa xia. Laosinu dii bii luosila. Bii ayi, qi xurie da qinu xjun digiewaa duguna. Tahge bii laa. Ngan huguji gua, noor kuraa xjijia. Bulai Pusaa ra! Ngandu diegu dongxi ughua. Nie dundoghnu, kamande da bii kilie. Nie dundoghsa huino, Yesu Matai doudajin fei huraajin kunnu sgejia, tie fei huraajin ghajiardu soujia. Ndaa daghaa ra. Yesu ulade gharaa xjijia, niguu suannu Shiga Tingeradu yangjilajia. Gigien bougu sghoudu ngan haranghuor kun laghaajia. Xiimen , Yesu yang ngannu Biide giji doudana, ngannu diunu Andelie Yaage Yuehan Feilii Baduoluomai Matai Duoma Yalefeinu bulainu Yaage Fenruidan doudajin Xiimen Yaagenu bulai Youdaa... Durang huino Yesunu chumailajin Youdaa. Niezhang kundu seinanu weina, Tingeranu guijiaa tahgena. Luasisan kundu seinanu weina, qiadiguna. Laajin kundu seinanu weina, xinieguna. Kun ndaa wulenu tahgenu mounge sgesa, ii gualasa, sguosa, tahgedu seinanu weina Tahge biesilde, diulilde, tingeranu seinanu luan ghula hughuiwa. Ngangulanu shduogunu uguanu kurgiejinhgede da nie shdaar ghalajia. ...haranjirghuon...haranduluon...haranniiman huren. Nie munu sier nembaa. Yaan? Amagaa tigii nigieji haanna? Tahge bayaan kundu mouniinu reguna. Tahge sghan dur douwaa baahalajia. (xinie) Ngan siernu duraalaji gua, ghaljiu raawaa xia. Tahge xiniesandu mouniinu reguna, nanguoraaji laaguna. Kunsge qimu shduarlagu sghoudu mouniinu kuriguna, shduogusa legi ghudal kiliejin ugua mudielghajinhgede da nie shdaarra. Tahge qigindenaa sunosaa gie: duitoudunaa sgil wuudi, tahgenu ujie adajin kundu da sein gi. Sguojindu da seinanu kilie. Mou giji gisan kunhgedu da yangjila. Kun qinu nienga hajiarre baghasa, tienga hajiarde da baghalahge. Kun qinu dielnu bulisa, qi nie duoragu dielnaa da huulaa ughuo dii. Kan qimu yaan yangjilasa, jiu tiendu ughua dii. kan qinu dangxinu bulaasa, dii bii hgilie ra. Qi muulasa kun qimu seina gisa, qi ama gi. Qimu sgil wuudijin kundu sgil wuudisa qimu yaan seinanu da weina? Mou kun da nie shdaarra. Qi qimu sein ghalajin kundu sein gilasa, qimu da yaan seinanu weina? Mou kun da nie shdaarra. Ngannu amagi mookina? Nie amagaanu nienu ugua guliesa? Naa taoyan! Pujia, Duitoudunaa jirge wuudi, nganguladu seinanu ghala. Kunhge ii harilisa da, asghuaji ughua. Tahgenu jiangli luan naamawa. Tahge jiu nie Tingeranu bulaina. Tie Tingeranu marshdaajin, mou kundu Tingera seina. Aabanaa shdaar kunhgede niezhang sana. Yesu, budangulanu jiula! Bii kilie, qimu da ii kilieguna! Kunnu zui bii dinki jiu qinu zui da ii dinkiguna. Kunnu raolie, Tingera da qimu raolieguna. Niewan! Duraanu qinu moorshde you. Kundu ughua,qimu da ughuaguna. Qi kundu yaan ughuasa, qimu yaan ughuaguna. Tie sghuar sghuarraa duri shdagunanu? Tie ghuorla nukuarra naa ii xjigunanu? Qi ghadiu nudurgu guorszinu sgena, amaga njienaanu nudurgu daliangnu sgen gua? Laosi, budanguladu surghua! Niewan, qimu hajiraa adaguna. Qimu turuosan ama tigiinge biesina! (xinie) Tie Tingeranu ugua sunosijin kunhge biesina. Bu ngannu tanigu duraalana. Qi nousa,ngan Miisaiya, mbaanu? Falisai kunge Yesunu doudaji uqilghana. Yesu ngannu kudunu xjiaanu shirie taadanu soujia. Bulaihge, ghada naadila xji! Sunoshdawuu gui! Xji! Bulaingula tiaopi ghula. Ngan ama gila rejia? Lii mudienu. Ngan ama gina? Nie kun ugua mudielghajin weisa, mookijinnu yaan kunniigunu mudieguna. Nie mou ninie kun weigunu mudieguna. Xiimen, bu mudienu nie ninie kun kanniigunu. Bu qimu kilieya. Kunge ghuor kundu asghuaji ughuajia. Niganu wuu bei mianguwa, niganu wuushi mianguwa. Tie ghuladu harilgu sier gua, nie kun jiu hgilieji gua. Alinge ngandu zui jirge wuudina? Bu muulasa tie luan sier asghuasan tie nigawa. Nembaa. Qi nou nie ninie kunnu! Bu tannu kudu kurisa, qi munu kualnu nghuaji gua, nie ninie kun nimpuzilanaa nghuajia, raawalanaa saagaa arilghaa xia. Bu resa, qi ndaa baa ughuaji gui, bu uruo rienu ngan munu kualde yizhi baa ughuana. Qi tuosila munu tolghuire mookiji gui, ngan funerdi tuosila munu kualderu mookijia. Bu qimu kilieya: Ngannu luan zuiniinu raolie xia, ngan jirge hudu wuudina. Kandu raoliesannu quoniisa, kan da jirge wuudigunu quonna. Qinu zuinu raolie xia. Nie kanna, ngan amagaanu zuinu raolie shdana? Ngan Tingeranu zunzhunlan gua! Qinu xuriejin sgil qimu jiulaa xia. Yesu anjii da langlana, nie Tingeranu guijiaanu seihan dundoghnu kiliena. Tiela handu nie haranghuor tuuzi da kidi ngan hanalghasan bieri. Turuo Moodaalaanu Maliiya weina, Xiiluunu kudugu gualajin Kuusaanu bierinu Yueyaana da Susana weina. Jialiiliinu mulaa huangshang Xiiluu ghadiunaa bieriniinu awujia. Shixiilanu Yuehan ngannu sguojia.  Tingaanu Xiiluu ngannu huradejiia. Amaxia? Budangula Naayinnu udie taada kurigu sghoudu, kun hugusan kungenu bulaala xjiguna Hugusan kun guafungenu duushenziwa. Yesu sgienu seina sgil sanaanu bangbanbgzinenge mookijia, kiliena: Bulai, pusaa ra! Tie jiu pusaa rie xia. Yesu ngannu aamadenu jiaokaa xia. Ngandu szagha Qi Yuehan kilieji relghasan kunniu? Darang zaizi kunnu sgaa sougui? Laosi! Laosi! Yuehan relghaji szaghana: Nie relghasan kunnu jiu qi yuu? Darang zaizi kunnu sgegui? Tahge sgesannu, sunoshdasannu Yuehandu kilie sghuor sgie xia you adajin youwaa xia Ndaa xuriejin kun, amagaa tigii biesiguna. Maalii, ndaa tieraa dii. Munu daaliira sou。 Sgenu? Bu Yesunu sgena. Kunge furie sajina. Sajigu jiuranu youxie furie moor qiriedu bouwaa xia, kunhge taa gina, xiuhge die xia Youxienu tarshiru bouwaa xia, furienu szu salaa shdaji guaiaanu, gharaa rie dugu jiu huowaa xia. Youxienu haraguorszi jiura bouwaa xia, haraguorszila handelaa shiga dena, kujiniinu awaa xia. Youxie sein ghajiarshdu bouwaa xia, digiewaa gharaa rienu hudu luan qiadijia. Laosi, Qi kunhgenu jiuranu ama gaanu biilaji kilienii? Tingeranu guijiaanu simgier jiu tahgedu mudielghanii. Zaizi kundu biilaji kilienii, ngangula nousa da ii sgeguna, sunosisa da ii lenderaaguna. Nie biilasannu niewa: Furie nie Tingeranu uguawa. Moor bierenduguhge ndangbahsa: kun nie uguanu sunosijia, tingaanu iilie sgildegu uguanu bulaa xiaanu ii xurieguna, ngangulanu jiula adaguna. Tarshiru weijinhge ndangbahsa: kun Tingeranu uguanu biesisange sunosijia. Sgildunu suahba gua, xuriejinnu sghou shdur gua. Sidanglagunu kurisa, tui gaa dena Haraguorszi jiuragunu ndangbahsa: kun nie uguanu sunosaanu, ngangulanu simqiandugu poofan, sier, uqigunu jiakaa duguna, ngangula bala adaguna. Sein ghajiarshdugunu ndangbahsa: kun Tingeranu uguanu sunosaanu, sein sgillaa qiraghdu tiewaanu, furienu sghange qiadilghagui gina. Kama da jilaanaa dilie yang yeghala haan gua, shirie duora gien gua. Tienu ndurshdu gieguna, garde rejin kunhge gigiennu sgeguna. Haawaa giesan dundoghnu gharaa die reguna, niuwaa giesannu dundogh ii ghariji rejinnu gua. Tahge sgil tieji sunosi, kandu weijinnu durang tiendu luan ughuaguna, kandu guisa lian ngandu wei gijin tienu nigiejinnu da bulaa xjiguna. Laosi, Qinu aama da diuhge ghadawa. Qimunge sgegui gina. Tingeranu uguanu sunosijin, jiu munu aama, munu diuhgewa. Niguu durnu, Yesu da tuuzihgenaa chuanre soulghajia. Ngan tuuzihgedunaa "Muruon tie rogh you" giji kiliena. Yougu sghoudunu Yesu noor kuraa xia. Laosi! Laosi! Yesu! Budangula huguguna! Chuanre szu diuraa rie xia, budahge huguguna! Budangulanu jiulajia! Tahgenu xuriejin sgil lai? Ngangula Gelasan ghajiarshdu kuraa xia, tie Jialiilii muxi roghdewa. Eh, eh, eh, eh, eh. Er, er, er, er, er. Yesu! Tingeranu Kuunu qi ndaa amaga nenginii? Qimu yangjilasa ndaa bii chengfala. Qinu nira yaannii? Ndaa Luan doudana Qimu yangjilaya, budangulanu yinjiandu bii xjilgha. Budangulanu hghainu diranu xjilghaa dii Ai! Hariji ra! Pusi sou! Pusi sou! Iiliehge tie kunsa gharaa rejia, Hariji ra! hghaihgenu diranu uruo xjijia. Ndiesa maalii you! Gharaa you! Qi you! Nie ghajiarsa you! Qi you! Ndiesa maalii you! Laosi, qi anjii yousa da, bu qimu daghaagunii. Kudunaa xji, hanandu kilie, Tingera qimu hanalghajia. Yesu tuuzihgelanaa tengdiesa youwaa xia, Boosaidaa xjijia. Hanala mudienu jiu ngannu daghaa xjijia. Nara bou xjigu sghoudu Biide kiliena: Laosi, Qi hanalanu sajilaa dii, ngangula dierien roghnu ayildu souji uqila xjilgha, budangulanu ndiexi kun guijin ghajiarra. Tahge diegu dangxinu ughua dii. Budahangde taawun haan shdimmawa, ghuor haan jighasiwa. Tingera aa! Tingere ghajiarnu niewan, qi hara ghajiarru taraanu tariji gharghana. Nie shdaghwa! Ii xuriegu! Shdingan! Hanala kiliena bu kanna? Youxie kiliena qi Shixiilasan Yuehanna, youxie kiliena qi Yiliiyawa darang kiliena qi niensa muxigu ugua mudielghajin digiewaa xia. Tahge lai? Tahge kilie bu kanna? Qi Miisaiyaawa! Nie dundoghnu kundu bii kilie. Tingeresa Resan Kun lanjiagh jiegunu luanna. Ngannu alaa duguna, ghuraangu durshdunu digiewaa duguna. Tahge kan ndaa daghaagunii? Laosi, bu qimu daghaanii. Bu kudugu kunhgedenaa niga kilieya. Ghajiar fulijin huinojia noujin kun Tingeranu guijiaadu ama yongchu gua. Ndaa daghaagui gijin weisa, jiu njienaanaa sheila shdaa dii durshdundu shizijianaa rguaanu ndaa daghaawaa dii. Njienaanaa jiulagui gijin kun aminnaa tarshdaguna, kan ndaandu wulsa aminnaa tarshdasa, aminnaa jiulaguna. Kun simqiannu dangxi iigua diilasa, njienaanaa hailaguna, yaan seina? Kan ndaa da munu uguanu xjiegunge sgesa bu, Tingeresa Resan Kun, Aabanaa da ugua kurgiejinhge muxi tie kunnu da xjiegunge sgeguna. Bu tahgedu kilieya ndiriegu kun jiura, youxie hugugunsa muxi Tingeranu guijiaanu sgeguna. Huino Yesu Biide, Yuehan Yaagenu duraanu ulare yangjilala xjijia. Yangjilagu sghoudunu Yesunu niurgenu bianlaa xia, diel dera qighaan guange gharaa rejia. Menzera Mooxii da Yiliiya ghuorla guangcairesa gharaa rejia. Ngangula Yesula guliena. Qi Tingeranu uguanu wanchenglaguna. Qi Yelusalengdu huguguna. Hajiraagu sghoudu, Biide Yesudu kiliena: Laosi, budangula ndiexi hudu seina. Ghuraan zhangfang daalaya; niganu qinuna, Menzeru rdlong rienu ngangulanu haawaa xia, ngangula jiu ayaa xia. niganu Mooxiina, niganu Yiliiyana. Rdlongresa hgharge kiliena: Nie munu Kuuwa, bu laghaasanna, tahge ngannu ugua sunosi. Laosi! Laosi! Qi munu bulainenge nou ba. Niga jiula, Ndaa nigahaan bulai wei. Qinu tuuzihge nie iilienu jiraawaanu shdaji gua. Ai, nie ii xuriegu, ugua ii sunosigu shidai. Bu tahgenu ndiexi renkinge ali sghou uliguna? Qi bulainaa duraa ra! Ngannu niurnu hanaa xia! Hudu guaiwa! Budanguladu Shiga Tingeranu yangjilagunu surghua. Nie shdaar yangjila: Tingeranu Aaba a, qinu niranu shiga delghaa dii. Qinu guijiaanu relghaa dii. Qinu uguanu sunosilghaa dii. Budanguladu shdimma durshdundu ughuaa dii. Budangulanu zuinu raolie dii, budangula da budangulade kui dielghasannu raolienii. Budangulanu sidanglajin sghoudu mouresa jiula gharghaa dii. Yangjila, jiu gharshdu ughuaguna; yeri, jiu yeriji uliguna; udiendu douda, jiu niewaa duguna. Yangjilajin kundu jiu weiguna, yerijin kun jiu yeriji ulaa duguna, udiendu doudajin kundu jiu niewaa duguna. (xinie) Tahgenu jiura kan aaba danglajin bulai jighasinu hgiliesa moghuinu ughuaguna? Ndiga hgiliesa mouyouyennu ughuaguna? Tahge seina guisa da, sein dangxinu kuu, xjundunaa ughuagunaa mudiena. Naa, tahgenu Tingeranu Aabanu ngandu yangjilajin kundu Funiesinaa ughuan guanu? Bu tahgede kilieya, tahge yaan dieji aminnaa digiegui giji, bierenaa yaan musilghagui giji, bii xinaali. Bie dielsa zhongyaowa, amin diegu dangxisa zhongyaowa. Kiriehgenenge muula: ngangula tarin gua, ama huraan gua, cangku da gua Tingera ngangulanu tijiena. Tahge nie xiuhgensa guizhonna! Tahgenu jiura kan xinaaliji amin shdurshduguna? Lian tigii mulaa dundoghnu da zuola adaguna, dii nguayinu yaan xinaalinii? Qi qijiaghnu nou,ama giji wosina. Qijiagh lesga warin gua, Suoluomen hudu bayaanniisa da, nie qijiagh tigii sghan gua. Tingera niudur wusinu sghan dalghana, malang luuzire jialaa duguna, Tingera tahgendu ii musilghagunanu? Tahge xuriejin sgil mulaawa. Haliunge dasba wuraalgha. Tahgenu xuriejin sgil haral guosi furie tigiinga da nienge xjuozide xjiurdii shdiaanu haira zailaa dii giji kiliesa uguanu sunosiguna. Sidanglagunu mianki adaguna, sidanglajin kundu mou reguna. Ningisa lasgurnu nie kunnu gujirenu xua diinu szure tarshdaa xjilgha. Tie huguaa diisa mulaa kunnu mou moorshde joulghagunsa seina. Tingeranu guijiaanu yaanlanu sarlana? Niela sarlana: Kunge haral guosi furieniinu yuanzirenaa tarijia. Shiga daanu xjuozingede furaa xia, xiu raalgharenu foornaa souna. Ngan yaan kilieniiha, bu lii lenderaanu Tahge amaga fei huraajin mou kunla handu uqinii dienii? Nar guijin kun snenbaanu yonglan gua, nar weijin yonglana. Bu sein kunnu doudala reji gui, mou kunnu yerila rejia. Tingershdagu ingannu gulie. Durang yaan weina? Tahge kun quonna da, bii ayiu. Tahgenu aaba njienaanu guijiaanu tahgendu ughua duraalana. Tahgedu weijin iilinaa daaldaa dii, siernaa niezhang kunhgedu ughua. Guizhong dangxi tingeradu ii quoguon deguna. Hualghai hualghaji xji adaguna, huarghai dieji xji adaguna. Guizhong dangxi anjii wei, sgil da anjii wei. Aanie, qinu nar hanaa xia. Nou! Nou! Ngannu hanalghaa xia! Lii xurieguna! Maali jiela ra! Tingeranu seinanduwa! Haranniiman fanna! Tingera qimu zhufulanii! Tahge jirghuon dur lisge warisa uliguna,nie jirghuon durshdu, nar ujiesa uliguna,hamburaagu durshdu luoliguna. nie jirghuon durshdu, nar ujiesa uliguna, hamburaagu durshdu luoliguna. Ghudalqiang kun a! Tahge hamburaagu durshdu karaara xua geisan asi jiganu silaala ii xiguniu? Nie ninie kun Yaabolahannu houdaina, Saadan haranniiman fan banglajia. Hamburaagu durshdu ngannu ii tirgiliegunanu? Sein laosi, bu ama gisa yongyuan digie souguna? Amagaanu seina giji doudanii? Tingerasa seinanu dii gua. Jielünu qi mudiena. Ghada bierihgenu bii naadi, kun bii ala, bii hualghaila, huu zhenren bii suu, aaba aamadunaa seina dangla. Nie iilinu bu mulaala zuola shdawa. Qi darang niganu qughuaawaa xia. Qi iilinaa daaldaanu niezhang kunhgedu hughua dii, jiu tingeredu sein dundogh weina. Tingaanu ndaa daghaawaa ra. Budangula maimaiqiwa; Sier luanna Bayaan kun Tingeranu guijiaadu xjisa luosiwa. Timian jiunu nudursa daawaasa bayaan kunhge Tingeranu guijiaadu uruoji xjigunsa qirwalla. Naa, kan amin tarlaguna? Nie kun adajin dundoghnu Shiga Tingera shdana. Tingeranu guijiaa ali sghoudu reguna? Tingeranu guijiaa resannu qi nudulanaa ii sgeguna. Qi nou, tie tiewa, niewa giji kiliejin kun gua. Tingeranu guijiaa tahgenu sgilduwa. Huino tahge ndaa, Tingeresa Resan Kunnu durniinu sgegu duraalana. Tahge ii sgeguna. Ghal qigudiesa nie roghsa tie roghde gigienge wulghana, bu bouji regu sghoudu jiu nie shdaarwa. Ngan muxi luan naama lanjiagh ujieguna, nie beizinu kun ngannu ii jieshoulaguna. Tingera, ghajiar buraasa bi faaluregu yi bii yi hua buraalghagunsa darang qirwalla. Ugua mudielghajinhge da rjiewuhge tahge sgesannu sge shdaji gua, sunoshdagui gisa sunoshdaji gua. Budangula yaan warigui? Huiqiaare amaji jiurijia? Qi ama giji jieshilanii? Qi sgildunaa hudenga tiiji njienaa Tingerade sgil wuudi. Bierendugu kunde njienaanaa tigii sgil wuudi. Duilana. Qi nin gisa, digieguna. Bierendugu kun kanna? Nie qiragh pujia ba. Luomaanu huangshang lai? Kunge Yelusalengsa Yelige bouji xjijia, moor dera bulijinhge dielliinu bulaanu, baghaa alaa daglajia. Xianglajin kunge nie moor derasa bouji rejia. Nie kunnu sgienu taadasannu hargaa daawaa xjijia. Yang niga Liiwei kun nienge ghajiarshdu rejia. Ngan da sgejia, taadasannu hargaa daawaa xjijia Jiu niga Saamaaliyanu kunge moor dera youji rienu sgejia. Sein sgil sanaanu taadanu kuraanu tuosi da duraasila ngannu shangbaarenu sirguji ughuajia. Basila banglaanu njienaanaa morirenaa funilghaanu diange yeriji soulghajia, sulaajia. Huiji durshdunu dianregu kundu ghuor miangu ughuajia, kiliena: "Qi ngannu sghange sulaa. Ii kurijin siernu bu hariji regu ughuaya." Nie ghuraan kunra alinge bulijinhgenu gharshdunu uruosan bierendegu kunna? Tiendu sein sgil sanasan tiewa. Naa, qi ningiji ghalala xji. Ai! Tie mulaa bulainu bii dangla, ndie relghaa dii, Tingeranu guijiaanu kun niehgenu tigiinga. Bu tahgedu kilieya Tingeranu guijiaanu nie mulaa bulii shdaar ii jieshoulasa, jiu uruoji xji adaguna. Kan ndaa laanu nie bulainu jieshoulanii ha, ndaa jieshoulana. Kan ndaa jieshoulaniiha, ndaa relghasan jieshoulana. Tahgenu jiura zui mulaanu jiu zui shigawa. Ai! Yaan dundogh gharijia? Amagijia? Nasalii kun Yesu dawaaji xjina. Yesu! Yesu! Daaweinu zisunnu,ndaa niezhangge sana! Bu qimu amagisa mbaa? Munu nudunenge sgelgha. Sgie dii ba. Qi xuriejin sgil qimu hanalghaa xia. Bu sgejia! Bu sgejia! Bu sgejia! Yesu Yelusaleng xjijin moorshde, luan kun ngannu sgegu duraalana. Kunhge yangjilaji jiulagu moorge duriji ughua. Tingeranu guijiaanu ingannu luange kilieji ughua. Nie kun jueshda ugua mudielghajinna. Niewan, laosi, ndaange jiula! Niewan aa, budangulanu jiula! Niewannu shduorla! Niewan aa! Budanguladu surgha! Yeligede Saagei doudajin fei huraajin kunge weina. Ngan hudu Yesunu sgegu duraalana. Bienu mulaa ghula, sgen gua, xjuozira paalaa gharaa xia. Tie fei huraajinna. Saagei, Saagei, maalii bouwaa ra, niudur bu tannu kudu sougunii. Munu kudu? Kan ngannu kudu souguna? Saagei amagaa Yesunu tanina? Sunosi. Sunosi jiamtoghge siernaa niezhang kundu ughuaya. Bu kannu pian gijiisa, kandu tiensa dieralanu hariliya. Bu lii xurienu! Fei huraajinge uluan huraasan hariliji ughuagu! Kamaada gua! Niudur jiulajin nie kudu kurijia! Ngan da Yaabolaahannu sunziwa. Tingeresa Resan Kun qughuasan kunnu yeriji jiulaguna. Sunosi. Budangula Yelusaleng xjigunii. Ugua kurgiejinhge jiurisannu munu dera ghariguna. Ndaa zaizi guijiaanu kunhgedu ughuaa duguna, mou kilieguna, xjielghaguna, niurderanu nempudieguna, baghaguna, alaa duguna. Ghuraangu durshdu digiewaa duguna. Yesu weiliao simqiannu kunnu zuinu raoliesa, alaa hugulghasa da, Yelusaleng deji xjiguna. Hanala Yesu resalage biesina, Yesu rjiewu giji kiliena. Laosi, qi tuuzinaa nanjin raalghaa dii ba! Bu kilieya, ngangula ii kiliesa tarshihge da qigharaa gharaa reguna. Tingeredu pinganna, ndurshdunu rongyao weina! Yesu Yelusalengde kuriji rienu sgienu tiriegu kundu wulaanu laajia. Bu muulasa pingan qimu ama giji reniigunu mudieguna, qi yang sgeji gua. Niguu dur mou gijin qimu ali roghsa da qimu weikiguna, xiruula dui gaanu weikiguna. Ngangula qimu da qinu buliinu buraalghaa degui gina. Tarshi tolghuire niga tarshi da gieji gua, Tingera qimu jiulagu sghounu qi mudieji gua. Yelusalengnu shiga nguamba shichangde furaa xia, Tingeranu shduarlagu ghajiar pujia. Thaawin, jirghuon, duluon, niiman, shzin, haran, haranniga, haranghuor, haranghuraan, harandieren, haranthaawin, haranjirghuon, haranduluon, haranniiman, haranshzin, hurin, hurinniga... Huiqiaare kiliejia: "Munu gar yangjilagu garra" . Tahge tienu hualghai garshdu furaalghaa xia. Ngan munu kaashdala amaguna! Danglaa gie! Danglaa gie! Qiraghsgenu douda! Qiraghsgenu douda! Kun Yesunu rjiewu doudana. Huiqiaa laosi da shduogungula jiura Yesunu fanduilajin kun niguu dur niguu dursa uluanna Bu sunoshdajia uluan kun yijing ngannu rjiewu doudana. Rjiewu? Shdimma hgiliejin hualghainu rjiewuwa. Tigii kun rejia, ugua kiliejia, yang youjia,kunsge marshdaajia. Siri ra! Ngannu daghaajin kun durdunde uluanna. Hana iili ngannu seina gina. Darang ngannu rjiewunaa gina. Bu tahgedu jinggaolaya: Nie niga kun dii shiqing gharghasa tahge fuzeila. Warjie ngan duilana. Jialiilii kundu szaghala xjiya. Yesu nie niga bang ghudalqiang huiqiaa laosi da Falisai kunnu yuelai yue sghuona. Ngangula tienu yuelai yue fanduilana. Yesunu daghaajin Youtai kun uluan dena. Yesu shiga nguambade niezhang guafunge sgejia, ngan ghuor fenzi giejia. Ughuasannu quonna. Qi uluange ughua adagunanu? Bu tahgedu kilieya tie guafu ughuasannu hanansa uluanna. Ngangula ughuajinnu si njienaanu lailasanna. Nie guafu njienaanu ii kurisa aadal laajinnaa iilinaa ughua xjijia. Kilie, qi yaan quanliila ningiji kilienii? Kan qimu nie quanliinu ughuawa? Bu tahgedu niga szaghaya. Shixii Yuehannu quanliiniinu Tingera ughuasannanu, kun ughuasanna? Yaan kilienii? Tingera ughuasanna giji kiliesa, ngan kilieguna: "Amaga Yuehannu ii xurienu? " "Kun ughuasanna" giji kiliesa, kun ndangulanu alaa duguna, ngangula xuriena Yuehan ugua mudielghajinna. Kan ughuasannu, budangula ii mudienu. Bu da tahgedu ii kiliem munu quanlii anjiisa resanna. Daigii kungede putao yuanzinge weina, kunhgedu warilghana, njienaa huladu youwaa xjijia. Putaonu huraagu sghou kuraanu cihoulajinnu njienaadu ughuajin putaonu huraala xjilghajia. Nie kunhge ngannu baghajia, ama da ughuaji gua. Yang niga cihoulajinnu xjilghajia. Ngangula yang ngannu baghajia, durang suobulajia, ama da ughuaji gua. Yang niga cihoulajin xjilghajia. Kunhge baghaa norlaa xia, jiraa gharghaa xia. Nie yuanzinu zhangguizinu kiliena: "Bu amahgii? Bu jirge wuudijin bulainaa xjilghagui.” Ngangula ngannu zunjilasa chuang.". Nie kunhge ngannu sgienu shanglianglaldena, kiliena: "Nie zhangguizinu kuuwa. Ngannu alaa dii da, yuanzi budangulana." Dii kilie! Ngannu yuanzi ghada gharghaanu alaa diijia. Yuanzinu zhangguizi nie kunhgenu amaxji bankigui? Ngan tie kunhgenu buraalghaguna. Yuanzinu zaizide zuukaa duguna. Tingeranu huiqiaara kiliejia: Gar pusilghajin tarshdasan tarshi zhudingshide furaa xia. Nie huiqiaa yaan iisiwa? Kun tie tarshi dera naa xjisa huguaa duguna. Nie tarshi kannu dera naawaa resa, kannu daaraa alaa duguna. Laosi, qi kiliesan surghuasannu iili nembaa. Qi kunnu niurde noun gua, qi Tingeranu huiqiaanu hanandu surghuana. Kilie, Budangula Luomaa guijiaanu huangshangde fei ughuasa, nembaanu, pujia? Niewan a, sunjongla! Nie quantaonga. Biiyenge ndaa niga noulgha. Nie diranu kanna, niranu kanna? Huangshang wa! Huangshangnu dangxiniinu huangshangdu harilaa ughua, Tingeranu Tingeradu harilaa ughua. Qi durang yaan ugua kiliegui? Jiangmian Shdimma Diegu dur, jiu Dawaa Xjigu dur, maka kurijia. Yesu Biide da Yuehannu Dawaa Xjigu durnu diegunu zhunbeilala xjilghajia. Bu tahgela nie Dawaa Xjigu dur diegunu diesa hudunge duraalajia. Bu nie shilangu diexi dii ii diem iizhi Tingeranu guijiaade weigugeiya. Niewan, Tingera a! Qimu shduarlanii, simqiannu rjiewu, qi putao raalghare putao soulghana. Nienu waraanu, hanala hughuaji uqildu. Bu kilieya, Tingeranu guijiaa kuriji ledaange, bu nie duraasinu dii ii uqiguna. Niewan, Tingera a! Qimu shduarlanii. Simqiannu rjiewu, qi ghajiarru diexinu shiga delghana. Nie munu biewa, tahgedu wulesanna. Tahge nie shdaar gisa, ndaa jilaa sou. Yeghara tahgedu ruusisan ciziwa, xinu ugua gulie giesanna. Nou! Ndaa daaldijin kun budangulala handu nie xirierewa. Bu yuekisan shdaar huguguna, ndaa daaldisan tie kundu mou dundogh reguna. Bu mbaanu? Niewan, kanna? Bu pujia ba? Bu qimula zuangde ii haajiem! Tahgenu jiura shiganu mulaa shdaar sou. Tolghui danglasan cihoulajin shdaar sou. Kan shigawa Souwaa uqijin kunnanu, Yegha dualajin kunnanu? Souwaa uqijin shigawa. Bu tahgenu jiura yegha dualajin tigiinga. Bu niezhang jiejia, ndaala handulaa weijin tahge wa. Munu Aaba ndaa quanli ughuaniigu tigii, bu tahgedu quanli ughuaya. Tahge munu guijiaare ndaala handulaa uqiguna, baozuore souwaanu Yiselienu haranghuor zhipainu shenpanlaguna. Dii pantu da gua. Xiimen, Xiimen! Sunosi! Saadan Tingeradu szaghajia, tahgenu sidanglagui gina, furie sheizilaniugu tigii sheizilagui gina. Qi dasbanaa bii tarshdaa giji bu qimudu yangjilawa. Qi haraa regu, ghadiuhgedenaa banglaji xurielgha. Niewan a! Bu qimula handu lou soula xjigui, handu hugugui. Biide niudur tighou hailagunsa muxi, qi ghuraan hui ndaa tanin gui giji kiliejia. Bu tahgenu xjilghagu sghoudunu, yama da wariji gua. Yaan ciraajia? Yama da ciraaji gua. Duo, sier tulun, kuabo weisa, warilde. Qidighua guisa diellaa daaldeldaa awulde. Bu tahgedu kilieya, huiqiaare jiurisannu: "Ngannu mou kun jirgaraji giejia", nie kiliesan uguanu munu dera reguna. Niewan, nou, ndie ghuor qidighua weina. Duo nembaa! Daahuiregu shduogungula muulaldena, Yesunu amagiji alaguna. Saadan Jialu kun Youdanu sgildenu uruojia. Ngan tuuziregu nigana. Ngan shduogula Yesunu warigunu shanglianglana. Yesu Yelusalengsa gharaa rejia, Ganlan ulara yangjilala xjijia. Tahge yangjila, warjie sidanglaguna. Youda sanshi liang miangudu wulaanu Yesunu daaldijia. Yesu mudiejia kunnu zuirasa jiulaji gharghasa amin buraagu sghou kurijia. Ngan yangjilaji kiliena: Aaba, qi ulisa, nie lanjiagh jielghagunu awaa dii. Munu shdaar bei xjilgha, qinu shdaar xjilgha. Niga ugua kurgiejin gharaa rejia, ngandu kuji ughuana. Yesunu kunorszi cizi tigii daghlaana. Tahge amagaanu noor kurinii? Pusaa ra, tahge yangjila, warjie sidanglaguna. Youdaa! Qi baa ughuanu Tingeresa Resan Kunnu daaldiguniu? Niewan aa! Qidighuala querjisa, uligunanu? Ra, ngannu waraa dii. Duo nembaa! Duo nembaa! Shdingan! Tahge qidighua waraanu bulijin wariniigu tigii ndaa warila rejia. Bu durshdundu tahgela handulaa wei, tahge ndaa ii wariguna Duo tahgenu sghouwa. Huraangu quanli weigu sghouwa. Tienu wari! Ngannu nou sou. Qiragh Yesunu Youtai kunnu rjiewuwa giji xogqian naadiji suobulana. Nienu rjiewu musijin waipaona. Kilie, yaan dundogh ghariguna. Rjiewu aa, qi budangulanu jiulaguniu? Qi amagiji jiulagunii? Ngan Yesula handuguna. Bu ngannu lii taninu. Bu handu weigunu sgewa. Budangula cihoulajinna. Kunsa duora sousa ama tigiinga? Qi ngangulala handuguna. Pujia , bu pujia. Ngan iidin Yesula handuguna, amagaanu gisa ngan Jialiilii kunna. Nguluo. Qi yaan kilieniiha ... bu lii mudienu. Yesu furaaji rie niga Biidenu nouna. Biide Niewan kiliesan uguaniinu muulaa gharaa rejia: "Tighou hailagunsa muxi, qi ndaa ghuraan hui ii taninu giji kiliejia." Niewan a, yangjilanii, qinu shiga nengli shdaar njienaa ndangbaghsanu xjjilgha. Budangulanu shduoguhge qinu uguanu ii sunosisa, qi raolajia. Qinu qinqinu gharijia, Qinu qinqi gharijia, ngangulanu buraalghan gua. Yinwei qi nganguladu jirge wuudina, ngangulanu raolajia. Kan qimu baghana? Kilie, kan qimu baghaguna? Dombaa! Sunoshdiwu gui? Ngannu laakaa daahuire gharaa you. You! Zongjiao gonghuiragu shduogungula handulaa Yesunu shenwenlajia. Qi kilie, qi Miisaiyaa weiu? Tahgedu kiliesa, tahge lii xurieguna. Bu tahgedu szaghasa, tahge ndaa lii kilieguna. Niudursa huino, Tingeresa Resan Kun Tingeranu warang roghdunu souguna. Naa,qi Tingeranu Kuuniu? Qi kiliesan nembii Kan ngandu ningiji kilie giji quanli ughuajia? Zui weina! Tie kiliesannu budahge njienaa sunoshdawa. Biilaaduo taada laakaa you. Oola, ngannu dailaa you. You! Yesunu laakaanu Luomaa guijiaa shiga neiyuon Biilaaduo muxi xjijia. Biilaaduo jiqian kunnu shizijiare dinkaa alajia. Tahge tigii shdie ndirie resa yaan dundogh wei? Nienge kun hanalanu shandonglana. Ngan ndiexi shiga nguambanu luanlalghajia. Amagiji chengfalagunii? Ala dii! Nie kun yaan fanlawa ha, bu nouji ghargha adanu. Ngan Luomaanu huangshangdu fei bii jiaoki giji kiliena, darang kiliena: "Bu Jiduu wei, bu rjiewu wei." Rjiewu? Qi quershda Youtai kunnu rjiewuniu? Qi kiliesannu nembaa. Ngan muxi Jialiiliiwa, duo ndirie rejia. Jialiiliinu? Nie niga Jialiilii kunnanu? Tingisa dii, Ngannu Xiiluude jiaokiya bai. Xiiluu darang Yelusalengdewa ba? Xiiluu taada laakaa xji! Qi kilie qi kannii? Qinu tuuzihge yaan kunna? Kunhge kiliena qi shdingannu ingannu shdana. Ndaa niga jielgha. Rjiewu a, ngan hanalanu sgillu alana. Ngan njienaanaa rjiewu gina. Nienga kun? Rjiewuwa? Munu rjiewu a! Kujide bagha! Biilaaduo taada kurgie xji. Nie ghajiar nganna. Nie kun yaan alaa diigu zuinu fankijia? Nienu niga dun baghaanu tirgilie dii. Daawaa Xjigu Durdugunu xiguan shdaar qi zuifan niga tirgiliegu gulaguna. Balabaanu tirgilie. Oola. Oola! Nie kunnu alaa dii! Balabaanu tirgilieya. Ngannu Shizijiara dinglaa dii! Tienu shizijara dinglaa dii! Qi,qi,tienu bagha. Biilaaduo, qi darang yaan sgijii? Ngan Yesuwa! Tahge ngannu amagaanu ningiji ciifulanii? Ngannu tirgilie dii, ngan Miisaiyawa! Ngan yaan mou dundogh ghalaji gua. Ngannu laakaa pusilghaa dii! Ngangula iizhi shigadu qigharaaji Yesunu shizijiare dinlaa dii gina. Biilaaduo ngangulanu shdaar xjilghajia. Kun alasan Balabaanu hurisan ghajiarsa gharghaa dii gina. Yesunu nganguladu jiaokaa xia, shizijiare dinlaa dii gina. Huinoji! Huinoji! Huinoji! Huinoji pusi! Ngulu! Niensa huladujia! Huinoji pusi! Ngulu! Ngulu! Huinoji pusi! Ngulu! Rangla! Qi moor bii dangla! Qimu ngula gisa qi ngula! Pusaa ra! Huinoji pusi! Qi yaan doudanii! Bu Gulinei kun Xiimenna. Ndirie ra! Diesinu qiarji! Shizijianu rgu. Maalii you! Huinojia! Huinojia! Huladujia! Rangla, moornu bii dangla. Rangla! Huinojia! Huinojia! Niewan a! Budahge qimude laanii. Qi szunge uqi. Niewan, uqi. Yelusalengnu xjungula, ndaadu liji bii laa, njienaadu da xjun kuudunaa liji laa. Noghuon xjuozidu tigii dundogh gharisa, huowaasan xjuozi huino amahguna? Yuan Tingera qimu bangla! Budangula qimude yangjilanii. Maalii you! Bouji ra! Maalii! Maalii! Maalii! Qi maalii you! Maalii dagha, maalii dagha! Maalii you! Maalii you! You! Qi muxiji you! Maalii you. Hana maalii. Pusilgha! Qi, dingzinu dingla! Diesinu aldegha! Aaba! Raolie dii. Ngangula mudien gua. Ngan kunnu jiulajinna; njienaanaa jiulalahge. Qi Miisaiya weisa, qi njienaanaa jiula! Shizijiaresa bouwaa ra! Budanguladu shdiegange jielgha! Yesunu shizijiara dinglajia, ngannu bierindunu ghuor bulijin dinglajia Nie jiu rjuange fansa muxi ugua mudielghajinhge kiliesan shdaar rejia. Nie diel yiban kunnu diel pujia. Ai! Tirgelie! Szilguna! Qimu kilieya: quan hualeya! Qinu yunqi seina, qi xiujia. Duo qi nie diella amahgunii? Yesunu ndurshdunu paizinge dinglajia, "Nie Youtai kunnu rjiewuwa" giji jiurijia Qi Youtai kunnu rjiewu weisa, njienaanaa jiula! Qi Miisaiya, pujianu? Njienaa da buda ghuornu jiula! Qi Tingerasa lii ayinu? Ngan ama mou dundogh ghalaji gua, tongyang xingfaanu shoukijia Yesu! Qi rjiewu sou diigu ndaange jilaa. Shihua, qi niudur ndaala handu tiantan turuowa. Durgundunu naranu ii sgenu. Iizhi san dian wuli taange hara ghajiarshdu ama da sgen gua. Shiga nguambaragu lianzi xijieresannu szaraa xia. Aaba, bu namxiinaa qinu gharshdu jiaokaa die. Qiraghgenu tolghuinu gharisan dundoghnu sgienu Tingeranu shduarlana: Tingera shigawa! Nie shihua sein kunna. Yaaliimaatai kun Yuese si gonghuiragu niga sein kun. Yuse nie gharisan dundoghnu tongyilaji gua. Ngan Biilaaduo taada xjiaanu Yesunu hugusan uruoniinu hgiliejia, nara bouji xjigunsa muxi foor turuo giewaa xia. Niewannu bie deranu mookijin xiangliao funirshdi tuosi awuji rewa. Bu nukuar giji ughuaya. Maalii you, Hamburaagu Dur maka kurijia. Xingqi tiandu shdie naama ngangula zhunbeilasan funirshdi tuosinaa waraanu foordera xjijia. Ngangula sgejia foor haajin tarshi nguruaa xia. Uruo xjiaanu Yesunu uruoniinu sgeji gua. Tahge amagaanu hugusan kunderu amintenu yerinii? Ngan ndirie gua, digiewaa xia. Ngan kiliesannu jilaawuu: "Tingeresa Resan Kunnu mou kunnu gharshdu jiaokiguna, dinlaa alaguna, ghuraangu durshdu digieguna." Sunosi! Tarshi nguruo xjijia! Foor turo uruo uruoji xjisa Niewannu uruonii sgeji gua. Quershda ugua. Yaanna? Niewannu uruonu gua? Ghuor kun gharaa rejia; dielnu nara shdaar faaguanlana. Ngangula kiliena: Amagaanu hugusan kundera amintenu yerinii? Zhenziwa. Xuriesa. Xuriesa. Budangula sgejia! Foor kangkiiwa! Noula xji! Niewan gua! Biide, qi budangulanu xuriesa! Yesu ghuor tuuzidenaa sgelghajia. Ngangula biesisange tuuzi jiuranu haraa xia. Niewan shihua digiejia! Xiimende sgelghajia! Budangula moorderu ngannu taniji gua. Shdimma biekigu sghoudu tanaa gharghaa xia. Yimaawuusidu! Ngan amaga tirie xjijia? Yuan tahge pingan. Tahge amaga poufalaanii? Amagaa sgildunaa huaiyilanii? Nou. Munu gharru kuallu nou, jiu mudieguna bu nembii. Tandelu da mudieguna. Namxiidu yesi maha gua, tahge nousa ndaa weina. Nie muxi bu tahgela handulaa weigu sghoudu kiliesan ugua wa, Mooxiinu faaluure, ugua mudielghajinhgenu huiqiaare ndaa jiurisannu iiguala ghariguna. Huiqiaare kiliejia: Miisaiyaanu hailaa duguna, ghuraangu durshdunu digieguna. Ngannu nirala simqiannu kundu sgil harigunu da zuinu buraaalghagunu xiarlaguna. Tahge nie gharisan dundoghgenu sgesan kunna. Bu ndaanu Aaba dayinlasannu tahgendu ughuagunii. Tahge ndurshdusa resan quanliinu zailiede laange, Yelusalengdu sga. Tingera sein dundogh ughualahge. Tingera, ghajiarshdugu quanli iiguanu ndaa ughuajia. Tahge xjiaanu kilie, simqiannu kun iiguala ndaa tuuzi dangla. Aaba, Kuu, Tingeranu Funiesinu nirala nganguladu nghuaji ughua. Bu tahgedu kiliesan uguanu ngaguladu kilieji iiguanu zunshoulalgha. Bu kijiede da tahgela handelaa wei, yizhi simqian buraa ledaange. Niensa muxi ugua mudielghajin huiqiaara szaliunge jiurijia Tingera Misaiyaanu pailaji relghaji kunnu jiulaguna. Yesunu aminnu szaliude gharaa soujia, ngan jiu Tingera kiliesannu kun jiulajinna. Ugua mudielghajin Yisaiya huqiaara jiurijia, "xjun kun bulai rguji turuoguna". Nie ugua gharijia. Tingera njienaa kujilanaa xjun kun Maaliyade bulai rgulghajia. Turuosannu Yesu wa. Xjun kun bulai turuogu ingan Tingera ughuasan niga shdaghwa. Kunhge mudie nie bulai jiu si Miisaiyawa, Tingeranu Kuuwa. Kunhge Yesunu sgesa Tingeranu sgesan shdaarra. Yesu kunhgenu narnu hanalghajia, zuinu raoliejia, kunhgenu jiulajia. Durang kiliena kunhgenu Tingeranu guijiaa reji duriguna. Yesu njienaa aminlanaa kunhgenu jiulajia. Ghuraangu durshdunu yaan digiewaa rejia, hugugunu daaraa bou xjilghajia. Yesu kiliejia: "Bu aminnaa kurgiegu quanli wei, huraa regu quanli da wei." Yesunu amin iigua ugua mudielghajinhge huiqiaara Miisaiyaanu jiurisan shdaarra. Yesu si Tingeranu uguawa. Tingera Yesula nie simqiandu njienaanaa mudielghana. Muxi Tingera kunhge ngannu muxi seihange dawaa giji kunnu szajia. Kun Tingeranu uguanu sunosiji gua, jiu zuinu fankijia. Zui kun da Tingeranu hajiraa gharjia. Huiqiaara jiurijia: "Hana kun zuinu fankijia. Zuinu daijiaa huguguna." Tingera arinna, zui weijin kun Tingeranu muxinu digie adaguna. Tingera huningenu Yaabolaahannu kuudenu hugula xjilghasan shdaar Yesunu pailaji Yaadangnu mulaa silaade hugula xjilghajia. Ningisa Yesunu xuriejin kunhge sangde Tingeranu muxinu haraa re shdaguna. Yesunu daghaajin kun ghajiar duora lii xjiguna. Tingeranu guijiaaranu gharji xjiaanu yongyuan Tingerala handu souguna. Yesu songde digiewaa rienu daghaajin tuuzidenaa kiliejia, "Munu nirala simqiandu kundu kilie: mou moorsa furaa dawaa rienu ndaa daghaajin kunhge Tingera zuiniinu raolieguna." Kunhgedu sgil kuji ughuaguna, kunhgedu surghuaji Tingeranu moorshde youlghaguna. Niga mouragu bieringe njienaa mounaa mudienu Yesunu daghaaji yougu sghoudunu Yesu kiliejia: "Qi ndaa xuriena, qinu zuinu raoliejia, qimu jiulaa diijia". Yesunu daghaajin kunhge duoragu shdaar yangjila da Tingeranu guanxi jiu seina da diiguna: Tingera a! Qinu sgil seina. Bu qinu uguanu ii sunosinu zuinu fankaa diijia. Munu sgildu mounge. Bu xurienii qi pailajin relghasan kun Yesu ndaa wulaanu shizijiara huguaa diijia. Huino yaan digiejia. Yesu munu zui laaginenge xingfaanu shoukijia. Bu qinu moornu younii. Qi ndaa jiulajin rjiewuwa. Qi munu zuinu raoliejia. Bu yongyuan qinu taada sou shdaguna. Bu qimu yangjilanii qinu Funiesinaa ndaa ughua, ndaala handula soulgha. Ngan ndaa qinu moornu sgelgha. Bu youjin moornu qi duraala. Simqiandugu kun iiguala qimu shduarlana. Aamen. Yesu daghaajin kundunaa kiliena: "munu huni munu hgharnu mudiena. Bu ngangulanu tanina, ngangula ndaa daghaana." Yesunu daghaajin kun durshdundu Yesula tangxialana. Yesu tingeradu gharji xjigunsa muxi kiliena: "Tingera iigua quanliinu ndaa ughuajia. Tahge mudie, bu kijiede da tahgela handu wei, zhidao simqian buraa taange.