Invitation to Know Jesus Personally

Galhhu, Molmil-Soqhhaq xilmeil buvqtaq: 'Molmil Jildul yaol heil alnei byulssaq yaol bi hhe'leev yiv taoq, Molmil naogo bi gaqzaq huvq movq a leil nga.' Yeilsul e qiq ssil hu alnei, aqyoq colssaq e wuqhol hhe'leev e yul hhaq nga leil hev qivq nga. Molmil-Soqhhaq xilmeil buvqtaq: "Haqjil'aqda naogo maq jol bei laq e ssaqmiqssaq qiq hhaq ssaqyo qiq hhaq bo lal nga.” Doq xil doq ngeeljilmeil Maqliya hultav duv lal wul naq. Molmil-Soqhhaq buvqtaq laq e aqmeil, Yeilsul col maq nyuqhev jivq meil deivq lal e aq, Molmil-milmiaoq ngeel taoq nga. Aqyoq aq, Molmil e Ssaqyo, Jildul ngeel wul naq. Colssaq Yeilsul yaol mol e, Molmil yaol mol aqmeil ngeel naq. Yeilsul Molmil e galma-yo'liq geemeiq miq; colssaq e zyul geiq miq; colnal yaol liq zaolkaq miq nga. Aqyoq yoqhhaq e wuqhol pieiqbial taoqngaoq colssaq e zyul ballalnei bi zaolsil nga. Yeilsul saoq nao ngeel taoq deivqhuvq al. Xilmeil aq, sil e liq deivqhuvq lal nia nga leil eil e nga. Aqyoq eil: “Ngal yoqhhaq wuqhol pieiqbial e qeiqlif jav, bavqhuvq e qeiqlif liq jav lil.” Molmil e doqsii qiq jivq eillul ma hha, salssilmeil maq pal nga. Yulmeilnei, Yeilsul e qiq ssil aq, Molmil-Soqhhaq hultav aqyoq yaol hal buvqtaq laq e aqmeil duv lal naq. Yeilsul e doqsii aq, Molmil e doq ngeel naq. Molmil Yeilsul yaol dal alnei, colssaq aqyoq yaol bi hev e nga. Yobei e taq, Molmil colssaq zaolduv alnei aqyo naogo gaqzavhhyulqaol nei bi jol ma leil nyuq nga. Tyulliq, colssaq Molmil e eildoq maq nalhaq na taoqngaoq zyul jav al. Zyul nei col ssolnei Molmil alkaq kaq naq. Molmil-Soqhhaq xilmeil buvqtaq: “Colssaq hal jol e zyul jav nga. Zyul jav alnei, hha sil nga.” Yulmeil taoqngaoq, zyulssaq Molmil naogo qiqgao maq joltavq qivq nga. Molmil aqyol qiq ssaq deilssaol alnei Yaboqlalha e ssaqyo ballalnei bi sil aqmeil, aqyoq ssaqyoyoteiq heil alnei Yaqdal e ssaqssyuq ballalnei bi sil. Molmil xilmeil aol e aq, Yeilsul yaol qeqzaq e col aqyoq naogo bi gaqzaq huvq movq leil taoq nga. Xilmeilnei, Yeilsul yaol qeqzaq e col aq, aqhhuv-qiq-lov maq dov yil sso nga. Yulmeil maqceil, Molmil-Gaoqhaoq a Molmil naogo salssilmeil joltavq sso nga. Yeilsul eil: ''Ngaq e colmiaol dal alnei col hal jol milnia geegaq yil. Neema nga pyu puv lal e col aq, Molmil halmeilliq aqyo zyul geiq na nga." Yeilsul hhoqleivq eil: "Molmil nei Molmil-Yo'lal bi ssavq yiv alnei ngaq yaol qeqzaq e col naogo qiqgao bi joltavq alnei, Molmil yo'liq bi meiq maqceil, Molmil galma lo'qomeil bi aol nia miq nga." Ssaqmiqssaq yul hhaq, aqyoq zyulgol ssiil al. Yeilsul aqyoq naogo eil miq: “Noq e zyul geiq wul naq. Nol ngaq yaol qeqzaq taoqngaoq, no wuqhol hhe'leev al.” Col qiq hhaq ngeeljilmeil Molmil yaol qeqzaq al ngaoq, aqyo zyul Molmil nei geiq wul naq. Yeilsul naogo qo'leiq zaq movq e col aq, aqhhuv pyu gaoqlaoq sal e doqsii xil dyul eil al ngaoq, Molmil naogo gaqzavhhyulqaolnei gaqzaq huvq sso naq: Molmil ei'eiq. Nol aq jilhevqnei. Nol meeq ya. Ngal miqteil noq yaol maq hev taoq, zyul aolbav yaq. Ngal nyuqpuv maq qivq wul yaq. Molmil, nol meeq ya. Nol noq e ssaqyo Yeilsul heil alnei ngaq e zyul e ballalnei Siiqziijaf hultav bi tavqsil. Naolhao, aqyoq yaol bi deivqhuvq lal. Ngal noq e yo'liq naogo qo'leiq zaq movq ya. Yeilsul aq salssilmeil ngaq e Yosaol ngeel naq. Molmil ei'eiq. Nol meeq ya. Noq nei ngaq e zyulgol geiq alnei ngal salssilmeil noq e naogo joltavq sso yaq. Nol Molmil-Yo'lal ngaq naogo qiqheiq bi joltavq alnei, noq e yo'liq ngaq yaol bi meiq. Ngaq a hhaqhav bivq alnei, neema qiq siq meil noq yaol bi gaq, nol hhyul e miqnieiq bi aol. Daqtav colssaq hal jol e noq yaol bi bavqpyuq lal miq. Almeiq! Yeilsul aqyoq yaol qeqzaq e col naogo xilmeil eil miq: “Ngaq e aqcivq nga doqteil nalhaq nia. Ngal aqyodyul yaol hev, aqyodyul liq nga naogo qo'leiq lal nga.” Yulmeil taoqngaoq, aqyomavq hal nao liq aqyoq naogo doq gee'qoq zaq; Molmil-Soqhhaq zol; Yeilsul eil e aqmeil aol e maqceil, aqnu col yaol liq Yeilsul e miqnieiq eilloq yil miq nga. Yeilsul aoqtav maq dav li siq e miqteil xilmeil eiltaq: "Molmil nei aoq ssol milcaq haoqbaoq a hal jav e qeiqlif saqnei, ngaq a bivq al. Taq guv. Ngal nolya naogo salssilmeil joltavq nga."