Invitation to Know Jesus Personally

Foer lang tsayt, hon ti profëte in ti Hayliche Xrifte kexrip, tas Hërkot en Mesiias xike teet fer ti sintiche layt rete un fereeniche mit Hërkot. Yeesus sayn leewe tsaycht tas eyer wërklich te Reter is. Te profët Isaiias xraypt: "Ti yungfraa wërt en khint waarte un kriit en puupche.” Un es is paseyert. Hërkot, torich sayn macht, hots ketuun tas Maria en khint uf ti welt preecht, wen se ach nii pay en man waar. Un tas khint waar Yeesus. Es xteet uf te Hayliche Xrifte tas te wuner fon sayn kepoer te sinaal fon Kot waar tas tas khint te Mesiias weyer, tee woo Hërkot "sayn Khint" nënt. Wën ti layt Yeesus kesiin hon, hon se ti natuer fom Hërkot sayn kraft kesiin. Tee hot ti layt keheelt un sayn sinte fertsayert, un tee hot tëne en plats ferxproch in sayne eewiche raych. Yeesus hot sayn leewe keopfert un hot te xtroof kenom fer ti kanse mënxe. Too is eyer peleept un hot ketsaycht tas sayn kraft kreeser is wii em toot sayn kraft. Yeesus saat: "Ich hon erlaupnis fer mayn leewe kewe un fer es noch mool tsurik kriin." Yeesus sayn leewe hot in kehal was ti profëte kexrip hate, un hot konfirmeyert tas em Hërkot sayn Haylich Wort eewich is un keet net feel, wii ti profëte kesaat hon. Yeesus is em Hërkot sayn wort. Torich Yeesus, wayst Hërkot sich selwer fer ti mënxe. Yeesus is khom fer uns leewe kewe in iwerflus, wii am aanfank, wii Hërkot te eyerxte man un ti eyerxt fraa kemach hot. Awer ti hon net an Hërkot ketraut, un hon tëm sayn komante net aan keheyert. In te Hayliche Xrifte xteet: "ale mënxe hon sinte" un "te loon fom sint is te toot." Ti layt woo sinte hon khëne net mit Hërkot leewe. Awer, soo wii Kot en kaprit kextelt hot uf em plats fon Aapraham sayne soon, hot eyer Yeesus kexikt fer uf te mënxe sayn plats xtërwe. Tee hot tas kemach tas tii woo an tee un Yeesus klaawe, in te presëns fon Hërkot khome khëne. Soo, tii woo Yeesus noo keen, wëre net kextrooft mit te hel, un leewe fer imer mit Hërkot. Wan Yeesus fon te toote peleept is, hot er kesaat: "Ti layt tuun in te kanse natsioone in mayne naame preetiche tas Hërkot ti sinte ferkept fon tëne woo sich arepenteere un sich noo tëm wëne. Yeesus saat aach tas er te Hayliche Kayst xike teet fer tii woo em noo keen fer tëne ti woerheet wayse, un kraft kewe fer Hërkot sayne weech noo keen. Wan ti sintich fraa sich arepenteyert hot un aankefang Yeesus noo keen als sayne Hër, saat Yeesus tëm: "Tayn sinte sin fertsayert. Tayne klaawe an mich hot tich keret". Yeesus saat tas wën en mënx wërklich an Hërkot klaapt, tas pewayst tas Hërkot tëm ti sinte ferkep hot. Yeesus, te Mesias, hot ti layt keruuf fer tëm noo keen. Tii woo tesitiert hon Yeesus noo keen, mise sayn relatsioon mit tëm aanfange mit tëne wërter: Hërkot, Teyer sayt kerechtich. Ich tanke Tich wayls Tuu mich liipst. Ich kewe traurich wayl ich net tayn ortnunge keheyert hon un sinte kemach keeche Tich. Ich tanke wayls tuu Yeesus kexikt host fer weche mich am krayts xtërwe, un wayl eyer fon te toote peleept is. Ich tanke wayl tee te xtroof kelit hot weche ti sinte woo ich kemach hon. Ich wil tayne weech noo keen, un Yeesus uf nëme als mayne Hër un Reter. Ich tanke wayls tuu mayn sinte fertsayert host, te weech uf kemach host tas ich pay tich khome teet un pay tich sin khënt fer imer in tayne Raych. Ich ferlange tas tuu meyer te Hayliche Kayst kepst fer mit meyer playwe un tayne weech tsayche. Tas tee mich kraft kept fer em se liipe mit mayn kans hërts un en leewe hon woo tëm tiint. Un tas ti layt em liipe uf ale plets fon te welt. Aamen. Yeesus hot fon sayn aanhënger kexproch: "Mayn xeef heere mayn xtim. Ich khëne se un tii khëne mich". Ti aanhënger fersamle sich, xpreche yeete taach mit em, xtuteere sayn wërter in te Hayliche Xrifte, fersuuche sayne payxpiil noo mache un tuun iwer tee xpreche fer anere layt. Yeesus fiert se un tuut se xtërke torich ti macht fom Hayliche Kayst woo in tëne sayn hërts leept. Ti tënke imer traan an was Yeesus kesaat hot fer sayn aanhënger eep eyer ruf is uf en wolek pis sayne troon im himel: "Hërkot hot mich ti kans autoriteet kep im himel un uf te eyert... Sayt sicher tas ich imer pay aych sin, pis am ën fon te tsayte ".