Mary's Visit to Elizabeth

Maaramakka he wode matara eesota dendada pude gezze deren diza issi Yuhuda katama badus. Zakaraasa keeththe gelada Elsabeexo sarotadus. Elsabeexa Maarami sarokaa siyida mala qanththan diza naazi izi qanththan guppides, Elsabeexinkka Xillo Ayanay kumides. Izakka ba qaala dhoqqu histtada, «Maccassa ubbaafe ne anjjettidaaro; Ne qanththan diza naazikka anjjettidayssa. Ta Godaa aaya taakko yaada tana oychchanaas tani oonee? Ne saroka qaala ta siyida mala ta ulo giddon diza nay ufayssan guppides. Polettana giidi Goday izis yootidayssa ammanidaara iza anjjettidaaro» gadus. Maaramakka, «Izi ba aylley kawushshateththaa xeellida gishshas ta shemppiya Godaa dhoqqu ooththada bonchchawus. Ta Ayanaykka tana ashshiza ta Xoossaan ufayettawus. Wolqqama Goday taas gita miishshe ooththida gishshas hachchife sinththan asi wuri tana anjjettidaaro gaana. Iza sunththayka geeshsha. Iza maaroy izas babbizaytas naa naa gakkanaas daana. Ba wolqqan daro mino ooso ooththides; ba wozina qofan otorettizayta laallides. Kawota kawoteththafe woththides, ashketa qasse dhoqqu dhoqqu histtides. Gafidayta lo7o miishshan kalssides; dureta gidikko mela kushe yeddides. Kase nu aawatas Abrahaamessinne iza qommotas gida hidota qaala naaganaas ba maareteththaa yuushshi qoppidi ba aylle Isra7eele maaddides» gadus. Maaramakka Elsabeexi achchan heedzdzu agina sire gam7ada baso simmadus.

Geeshsha Maxaafa

The Word for the World International