Can the Bible Be Trusted?

Йакборет фикр чӯɣҷо, чӣзард Исо пайраwен лẙвен идê, Китоби Муқадас нур мāшҷа ца, wи даwрā Китоби Муқадас, йāни матни асли қати баробар? Бӣблийа йид Китоби Муқадас идê, аз Хуδой дāкчӯɣҷинат, муддати 1500 соланд нивишин вад. Ақẙнийаϑ дам дарӯнанден лап китобен идê, дар борайи Хуδойат, Wи одобат, ахлоқ қойидайен идê, мардумард ца дāкчӯд. Китоби Муқадас дарӯнанден пӣнȝ китоб Мӯсойандат, Доwӯд Забӯрат, Инҷилат, Исо ẋогирден нẙмайенга. Йā мāшард мāш тāрӣх, аррāнгат йи қисми офарӣниẋи Хуδой нақл киẋт. Йик ди ҷāт идê, Китоби Муқадас тарҷумайенен лап сиц, йилāвен фикр кинен идê, йā дигаргӯн сиц. Сар пиро Китоби Муқадас арай зивти нивишчин вад, амо бāд дига зивенти мис тарҷумā сат, лāк арчāй ху зивти Хуδой Калẙм ẋêйдоw вāрδед. Йилāв халқенанден йаст йичанд тарҷумайен, амо wев мāни йӣwаϑ. Фанā вирӯɣҷин қадӣмā дастнаwӣсен ми наw тарҷумā рости тасдиқ кинен. Мисол, 20 асрийанд бāри Мурдā хезанден 981 қадӣмā дастнаwӣсен вирӯд идê, 3-йум аср пиро аз мӣлодат, йакум асри бāди мӣлоден нивишчин ца вад. Йӣw аз дев дастнаwӣсенен Ишайо пайғумбаранд вад идê, 66 боб wеванд вудат, дар борайи Исойи Масе айотат, мāрген пеẋгӯйи ца чӯд. Йику вирӯɣҷин матн Ишайо пайғумбаранд ца вуд, пурра мам наw матн Китоби Муқадас қати баробар. Йику қисм Китоби Муқадасанд дар борайи Исо зиндаги ар ми зимāδ ца лẙвд, Wи ẋогирденен wам нивишт идê, 1-ум асрийанден зиндаги ца чӯд. Wāδен дастнаwӣсен тар фук ẋāрен боẋтат, Исо ẋогирденен wев хурд нивиштху, дига пайраwени Исойарден wев тақсӣм чӯд. Мāш даwрāндийен тāрӣхшиносен 25000 нусхāйен Китоби Муқадас вирӯд. Wāδен фукаϑ тар йакдигар мẙнандат, озиразамẙн Китоби Муқадас қатийен баробар. Тар Британия китобхẙнā пуррā Китоби Муқаддас йаст идê, Йунẙни зивти нивишчин ца. Wам нẙм Кодекси Синай. Йид Китоб 350-ум соли мӣлодийанд чоп сатху, шичӣнҷ Китоби Муқадас наwиштаҷотенен йик тар wам Китоби Муқадас ҳазор сол тар пиро нивишчин ца вад лап мẙнанд. Китоби Муқадасард боwари чӣдоw мӯмкин.