آغاز

‏اللہ تعالےٰ پاک اور عظیم ہستی ہے۔‏ ‏اُس نے ابتدا میں ہر چیز اپنے کلام کے وسیلے‏ ‏سے خلق فرمائی۔‏ ‏جب ہم زمین و اسمان پر نگاہ ڈالتے ہیں،‏ ‏تو رب العالمین کی حمد کرتے ہیں،‏ ‏جو رحمان و رحیم ہے۔‏ ‏اللہ تعالےٰ کی پیدا کردہ‏ ‏ہرایک چیز اچھی تھی،‏ ‏ہر چیز اللہ تبارک و تعالےٰ کی عظمت، بُزرگی‏ ‏اور قُدرت ظاہر کرتی تھی۔‏ ‏اللہ تعالےٰ نے پہلے قسم قسم کے پودے اور‏ ‏حیوانات پیدا کئے۔‏ ‏اس کے بعد خالق کائنات نے زمین کی خاک سے‏ ‏دنیا کے سب سے پہلے انسان کا پتلا بنا کر‏ ‏اُس میں رُوح پھونکی،‏ ‏تو وہ پتلا جیتا جاگتا انسان بن گیا۔‏ ‏یہ پہلے انسان آدم علیہ السلام تھے۔‏ ‏پھر خالق کائنات نے حضرت آدم پر‏ ‏گہری نیند بھیجی‏ ‏اور ان کی پسلیوں میں سے ایک نکال‏ ‏کر بی بی حوا کو بنایا۔‏ ‏اللہ تعالے نے حضرت آدم اور بی بی حوا کو‏ ‏اپنی شبیہ پر پیدا کیا‏ ‏اور ان کو ایک خوبصورت باغ،‏ ‏باغِ عدن میں رکھا۔‏ ‏تاکہ اللہ تعالے کی قربت‏ ‏میں مسرت اور شادمانی سے رہیں۔‏ ‏اللہ تعالےٰ نے حضرت آدم سے فرمایا‏ ‏باغ کے سب درختوں کا پھل تم کھا سکتے ہو‏ ‏لیکن شجر ممنوعہ کا پھل کھایا تو مرجاؤ گے۔‏ ‏ایک دن شیطان نے بی بی حوا کو‏ ‏وہ پھل کھانے کے لئے بہکایا۔‏ ‏یوں انہوں نے وہ پھل توڑ کر پہلےخود کھایا‏ ‏اور پھر حضرت آدم کو دیا۔‏ ‏انہوں نے اللہ تعالےٰ کی نافرمانی کی۔‏ ‏جس وجہ سے اللہ تعالے کے ساتھ‏ ‏ان کا تعلق ٹوٹ گیا۔‏ ‏کیونکہ اللہ تعالےٰ پاک ہے‏ ‏اور گنہگار اس کی قربت میں نہیں رہ سکتے۔‏ ‏اللہ تعالےٰ نے حضرت آدم اور بی بی حوا‏ ‏کو باغِ عدن سے نکال دیا۔‏ ‏ان کی نافرمانی ان کے اور تمام نسلِ انسانی‏ ‏کے لئے موت کا پھندہ بن گئی۔‏ ‏لیکن غفور و رحیم رب نے‏ ‏نسلِ آدم کو اپنی رفاقت میں‏ ‏بحال کرنے کا منصوبہ بنایا۔‏ ‏تاکہ انسان پھر سے اُس کی قربت میں آ جائے۔‏ ‏کلام مقدس میں اللہ تعالےٰ نے بنی نوع انسان‏ ‏کے گناہوں کی معافی‏ ‏اور اپنے ساتھ انسان کی‏ ‏رفاقت بحال کرنے کے منصوبے کو ظاہر کیا ہے۔‏ ‏اس منصوبے کا کچھ حصہ اللہ تعالے نے‏ ‏حضرت ابراہیم علیہ السلام پر ظاہر کیا۔‏ ‏ابراہیم اللہ پر ایمان لائے اور‏ ‏اس کی عبادت کرتے رہے۔‏ ‏پروردگار عالم نے حضرت ابراہیم کو‏ ‏برکت بخشنے‏ ‏اور ان کے وسیلے سے دنیا کی سب‏ ‏قوموں کو برکت دینے کا وعدہ کیا۔‏ ‏اللہ تعالےٰ نے یہ بھی وعدہ کیا کہ ابراہیم‏ ‏کی اولاد کو اتنا بڑھاؤں گا‏ ‏کہ ریت کے ذروں اور آسمان کے ستاروں کی‏ ‏مانند گننا مشکل ہو جائے گا۔‏ ‏ابراہیم نے اپنے رب کے وعدہ پر بھروسہ کیا۔‏ ‏اس وجہ سے اللہ تعالےٰ نے انہیں اپنے‏ ‏نیک بندوں میں شامل کیا‏ ‏اور انہیں خلیل اللہ کا لقب عطا فرمایا۔‏ ‏ایک دفعہ اللہ تعالےٰ نے حضرت ابراہیم کو‏ ‏آزمانے کے لئے ایک حکم دیا۔‏ ‏اللہ تعالےٰ نے آپ سے فرمایا‏ ‏کہ اپنے عزیز فرزند کو میری راہ میں‏ ‏قربان کردو۔‏ ‏حضرت ابراہیم جانتے تھے کہ‏ ‏اسی بیٹے سے میری نسل چلے گی،‏ ‏پھر بھِی انہوں نے رب کریم پر بھروسہ کیا‏ ‏اور اس کے حکم پر عمل کیا۔‏ ‏وہ اپنے بیٹے کو اللہ تعالےٰ کے حکم پر‏ ‏قربان کرنے کے لئے تیار ہوگئے۔‏ ‏لیکن جب حضرت ابراہیم نے چھری اٹھائی‏ ‏تو اللہ تعالےٰ نے فرمایا‏ ‏ابراہیم بچے کو نقصان نہ پہنچانا۔‏ ‏میں جانتا ہوں کہ تم میرا حکم مانتے‏ ‏اور ڈرتے ہو۔‏ ‏تب حضرت ابراہیم نے قریب ہی‏ ‏ایک مینڈھا دیکھا‏ ‏جس کے سینگ ایک جھاڑی میں پھنسے ہوئے تھے۔‏ ‏آپ نے اللہ تعالےٰ کی طرف سے‏ ‏مہیا کردہ مینڈھے کو‏ ‏اپنے بیٹے کے بدلے قربان کردیا۔‏ ‏خدائے کریم نے ابراہیم کے بیٹے کے بدلے میں‏ ‏مینڈھا قربان ہونے کے لئے مہیا کر کے‏ ‏انسانوں کے لئے اپنی‏ ‏عظیم محبت کا اظہار کیا۔‏ ‏ویسی ہی محبت جیسی ایک باپ اپنی‏ ‏اولاد سے کرتا ہے۔‏ ‏یہ واقعہ اللہ تعالےٰ کی طرف سے بنی نوع‏ ‏انسان کے گناہوں کی معافی کے لیے‏ ‏ایک قربانی کے انتظام کو ظاہر کرتا ہے۔‏ ‏اللہ تعالےٰ نے فرمایا کہ وہ ایک معصوم‏ ‏شخصیت کو بھیجے گا‏ ‏کہ وہ نسل آدم کے گناہوں کے عوض قربان ہو‏ ‏اور باغِ عدن میں ہونے والی نا فرمانی کا‏ ‏احساسِ شرمندگی دور کردے۔‏ ‏وہ معصوم ہستی اس عظیم قربانی کے وسیلے سے‏ ‏ایمان لانے والوں کا رشتہ‏ ‏پروردگار سے جوڑ دے گا۔‏ ‏تاکہ انسان پھر سے اس کی قربت میں رہیں۔‏ ‏انبیائے کرام نے اس ہستی کو مسیحا کہہ کر‏ ‏مخاطب کیا ہے۔‏ ‏اللہ تعالےٰ اس مسیحا کو بھیجے گا‏ ‏کہ وہ لوگوں کو ان کے گناہوں سے نجات بخشے۔‏ ‏اور خدا کی نمائندگی کرنے والے کی‏ ‏حیثیت سے ان کا حاکم ہو۔‏ ‏آمد مسیحا سے کئی سو سال پہلے‏ ‏انبیاء نے فرمایا تھا‏ ‏کہ آنے والا مسیحا کیا کرے گا؟‏ ‏اور اس کے ساتھ کیا ہوگا؟‏ ‏داؤد علیہ السلام نے فرمایا کہ‏ ‏اللہ تعالےٰ مسیحا سے کہے گا‏ ‏"تم میرے فرزند ہو۔"‏ ‏آپ کا مطلب یہ نہیں تھا کہ نعوذ باللہ‏ ‏وہ اللہ تعالےٰ کے جسمانی بیٹے ہوں گے‏ ‏کیونکہ کلام اللہ میں آیا ہے کہ‏ ‏وہ ازل سے کلمتہ اللہ ہیں۔‏ ‏آپ کی ولادت ایک کنواری بی بی‏ ‏حضرت مریم صدیقہ کے بطن سے ہوگی۔‏ ‏انبیاء کرام نے جب "ابن اللہ" کی‏ ‏اصطلاح استعمال کی‏ ‏تو اس کے ذریعے انہوں نے اللہ تعالےٰ کے‏ ‏ساتھ مسیحا کے قریبی تعلق کو بیان کیا۔‏ ‏اوراس بات کا بھی اعلان کیا کہ وہ سب جہاں‏ ‏کے لوگوں کے گناہوں معاف کرنے والا ہے۔‏ ‏انبیائے کرام نے اس بات کی بھی پیش گوئی کی‏ ‏ایک کنواری بی بی امید سے ہونگی‏ ‏اور اُن سے بیٹا پیدا ہوگا۔‏ ‏انبیا کرام نے یہ بھی فرمایا‏ ‏کہ مسیحا کی ولادت بیت اللحم میں ہوگی۔‏ ‏مسیحا یروشلیم میں بادشاہ کی حیثیت سے‏ ‏داخل ہوں گے۔‏ ‏مسیحا کا قریبی ساتھی انہیں چاندی‏ ‏کے تیس سکوں کے عوض‏ ‏گرفتار کروا ڈالے گا۔‏ ‏حضرت داؤد نے فرمایا کہ‏ ‏مسیحا اپنی جان قربان کردیں گے‏ ‏مگر اللہ انہیں تیسرے دن پھر سے‏ ‏زندہ کرے گا۔‏ ‏حضرت دانیال نے مسیحا کو‏ ‏آدم زاد کہہ کر مخاطب کیا‏ ‏اور فرمایا کہ وہ بادلوں پر سوار‏ ‏ہو کر سب سے اونچے آسمان تک پہنچ جائیں گے‏ ‏جہاں پر اللہ تعالےٰ انہیں سارے جہان کے‏ ‏لوگوں پر اختیار بخشے گا۔‏ ‏دو ہزار برس پہلے ایک ہستی‏ ‏اس دنیا میں تشریف لائی‏ ‏جس کا اسم مبارک "عیسیٰ المسیح" تھا۔‏ ‏جنہیں یسوع المسیح بھی کہا جاتا ہے۔‏ ‏جب لوگوں نے ان کے حیرت انگیز کام دیکھے تو‏ ‏ایک دوسرے سے سوال کرنے لگے‏ ‏"کیا یہی مسیحا ہیں؟"‏ ‏انبیائے کرام نے جو کچھ آنےوالے مسیحا‏ ‏کے متعلق فرمایا تھا‏ ‏کیا وہ سب کچھ ان کی‏ ‏زندگی میں پایا جاتا ہے؟‏ ‏اس فلم میں یہ دکھایا گیا ہے‏ ‏کہ انجیل شریف کے مطابق حضرت‏ ‏عیسیٰ المسیح کون ہیں۔‏ ‏آپ نے کیا کِیا اور کیا فرمایا۔‏ ‏اس فلم میں ایک شخص حضرت عیسیٰ المسیح کا‏ ‏کردار ادا کر رہا ہے۔‏ ‏یوں توانسان اس لائق نہیں‏ ‏لیکن یہ فلم اس لئے بنائی گئی ہے‏ ‏کہ لوگ مسیحا کی پاکیزہ زندگی کے‏ ‏متعلق جان سکیں‏ ‏اور وہ برکات حاصل کرسکیں‏ ‏جن کا وعدہ پروردگار عالم نےفرمایا ہے۔‏